Habitantenan di Otrobanda den kombersashon durante Asamblea di Pueblo
Habitantenan di Otrobanda den kombersashon durante Asamblea di Pueblo
Willemstad – Kiko realmente ta pasando den bario di Otrobanda? Kiko habitantenan ta preokupá, i kiko nan ta konsiderá importante pa futuro di nan bario? Djabièrnè 27 di mart, di 7 pm pa 9 pm, habitantenan ta bon biní na Sentro di Bario Otrobanda pa e promé enkuentro di Asamblea di Pueblo Otrobanda.
Durante e anochi aki, un pregunta lo ta sentral: ‘Kiko ta pasando den nos komunidat?’. Den un ambiente habrí i sigur, residentenan lo haña espasio pa kompartí nan eksperensianan, preokupashonnan i ideanan. E reunion ta grátis i tur hende di e bario ta bon biní pa djòin e kombersashon.
Asamblea di Pueblo ta un inisiativa di Curaçao Doughnut Economy. Esaki ta un movementu ku ta boga pa un balansa entre nesesidatnan sosial básiko i límitenan ekológiko, i ku ta ofresé un alternativa pa kresementu tradishonal pa medio di proyektonan lokal, sirkular i di kolaborashon. P’esei e proseso partisipativo den tres bario: Otrobanda, Montaña i Brievengat. E meta ta pa enbolbí residentenan aktivamente den desishonnan ku ta afektá nan ambiente di biba.
E proyekto ta konsistí di vários fase. Esakinan ta inkluí diskushonnan den bario pa rekohé informashon riba kiko ta biba den komunidat, i diálogonan mas profundo ku un grupo diverso di residentenan. Ademas, lo tin un tradukshon kreativo di e historianan den arte (palabra, imágen i zonido). Finalmente, lo tin un presentashon públiko durante e Wintertuin Curaçao Festival na sèptèmber 2026.
E aporte di residentenan ta forma e base pa proposishonnan konkreto i bista kompartí ku lo wòrdu debolbí na komunidat. Tambe lo wòrdu presentá un manifiesto durante un enkuentro ofisial ku, entre otro, Gobernador di Kòrsou i Parlamento.
E organisadónan ta invitá tur habitante di Otrobanda pa laga nan bos tende:
“Bin papia, skucha i aportá ideanan. Loke bo ta konsiderá importante pa e bario, ta importante.”
E evento ta djabièrnè 27 di mart 2026, di 7 pa 9 pm na Sentro di Bario Otrobanda. Entrada ta grátis. Por inskribí via https://tinyurl.com/ADPOtrobanda òf via WhatsApp na +599 9 517 3273.
