Komo selebrashon di dia mundial di Teatro: Dos funshon di Piar, e Último bataya

Komo selebrashon di dia mundial di Teatro:

Dos funshon di Piar, e Último bataya

 

Bintishete di mart ta fecha ku mundialmente ta selebrá dia di Teatro. Tema di dia di Teatro 2026 ta “Teatro i un kultura di pas. Mundu ta un esenario… i pas ta e storia ku nos mester konta”.  E selebrashon di un dia di teatro akí ta inisiativa di International Theatre Institute (ITI) na 1961 i ta konta ku sosten di UNESCO. Meta di e dia akí ta pa kòrda e poder ku un aktuashon bibu tin pa fomentá diálogo, interkambio di kultura i kreatividat. I tambe pa enkurashá gobièrnunan i institushonnan rekonosé ku Teatro tin balor pa kresementu sosial i ekonómiko. 

For di 2012 Teatro KadaKen ta selebrá e fecha akí dunando komunidat chèns pa eksperensiá  un obra. E aña akí tin oportunidat pa mira e obra “Piar, e Último bataya”. E ta un obra musikal ku ta trata bida di Manuel Piar (1777-1817), luchadó pa libertat yu di Kòrsou ku tabatin un ròl krusial den terminashon di opreshon kolonial den nos region. Piar tabata forma parti di un movementu regional ku tabata mantené un relashon estrecho ku Kòrsou, i ku tabata di gran importansia pa a fomentá ideanan di libertat den e pueblo di su isla natal. Durante aña eskolar aña pasá skolnan sekundario a wak e obra akí i usa e momentu pa e hóbennan diskutí, pensa i forma nan opinion riba temanan ku a bin dilanti den e obra manera libertat, demokrasia, héroe i union. 

Lo tin funshon di Piar, e Último bataya dia 27 i 28 di mart den Teatro Aula Habaai. Teatro KadaKen ta invitá spesialmente esnan ku no a eksperensiá un obra teatral ainda bin wak e obra i despues interkambiá di idea ku otro bishitante riba e temanan ku a bin dilanti den e obra.

Karchi optenibel na Mensings Caminada, Van den Tweel Supermarket, Sentro di pago Tu y Yo i online na Caribbeanticketshop.com  pa XCG 30.00 pa karchi

Teatro KadaKen|Margo Groenewoud