Papia tokante plaka ku Grupo 5
Kon nos florin ta wòrdu yamá? Bo por mira e diferensia entre e 1 i e 5 florin karibense? Kuantu bo ta sobra si bo gasta 50 florin den e tienda di ko’i hunga i tambe kumpra algu chikitu pa bo ruman chikitu pa 20 florin? Esaki tabata algun di e preguntanan ku e alumnonan di Grupo 5 na Albert Schweitzer Foundation Education a risibí di Stefan Riezebos, trahadó di maneho na Representashon di Hulanda na Willemstad (VNW), i Shekinah Dare di Banko Sentral di Kòrsou i Sint Maarten (CBCS). Stefan i Shekinah a para dilanti di e klas komo parti di Siman di Plaka pa papia ku e alumnonan tokante plaka na un manera aksesibel i interaktivo. E muchanan tabata hopi enbolbí den e lès i a wak e plaka ku hopi interes, spesialmente ora nan a haña pèrmit pa analisá e biyetenan real di 200 florin di aserka.
Siman di Plaka ta un inisiativa di CBCS, modelá riba e ehèmpel hulandes. Durante e siman aki, tur skol skol di fundeshi lo risibí kaha di plaka ku ta kontené monedanan falsu i biyetenan di e Florin Karibense. Maestronan por usa e kaha aki pa integrá tópiko finansiero den lèsnan di matemátika na un manera hunga.
“Ku lansamentu di e proyekto aki, CBCS ta enfatisá su kompromiso pa promové outosufisiensia finansiero den di e komunidatnan di Kòrsou i Sint Maarten. A base di e responsabilidat sosial aki, e Siman di Plaka – inspirá pa e Siman di Plaka Hulandes – a wòrdu inkluí den e planifikashon stratégiko di CBCS pa 2026–2020. E Siman di Plaka ta tuma lugá. anualmente na mart; e promé edishon ta kore e aña aki di 23 pa 27 di mart,” CBCS a deklará den un komunikado di prensa.
Representashon di Hulanda na Willemstad (VNW) ta sostené e proyekto aki pasobra ta siña muchanan na Kòrsou i Sint Maarten kon pa manehá plaka na un manera leuk.
“Ku e kaha di plaka i otro materialnan práktiko durante e Siman di Plaka, nos ta hasi asuntunan di plaka komprendibel i rekonosibel pa mucha,” Riezebos ta splika. “Di e manera aki, nan ta siña trempan kon pa manehá plaka na un manera sabí – i esei ta keda ku nan pa henter nan bida.”
E abilidatnan básiko aki ta yuda nan hasi mihó eskohonan despues den bida i evitá trampanan finansiero, manera debe i kompranan di impulso.
-
Stefan Riezebos (VNW) huntu ku Shekinah Dare (CBCS) ta papia ku alumno di grupo 5 tokante -
Kompará e diferente moneda i sèn di papel -
Riezebos ta papia ku alumno di grupo 5 tokante sèn -
Shekinah Dare ta duna splikashon tokante plaka
