Minister Pisas ta laga organisá, Reunion ku stakeholders den kuadro di renobashon Playa Sta. Cruz

Minister Pisas ta laga organisá,
Reunion ku stakeholders den kuadro di renobashon Playa Sta. Cruz

Willemstad – Komo un kantidat di playa públiko na Banda Bou (manera Playa Piskadó, Playa Kenepa Grandi i Chikí i Daaibooi) akualmente ta hopi bishitá, tin e nesesidat pa halsa e fasilidatnan i kapasidat di e playanan ku ta ménos uzá pa asina aliviá e okupashon riba e playanan públiko na Banda Bou ku ta risibí hopi bishitante.

Un di e playanan ku tin bastante potenshal ta Playa Sta. Cruz. Lamentablemente e fasilidatnan di palapa, kas di piskadó, pir, snèk i baño na playa di Sta. Cruz ta dekaí i den hopi mal kondishon. Den e kuadro aki Minister Gilmar Pisas enkargá ku desaroyo di playa a instruí Ministerio di GMN pa aserká architekto señor Lyongo Juliana pa e identifiká tur e deseonan di e stakeholders i despues presentá un diseño nobo pa Playa Sta. Cruz. Esaki konforme Minister Pisas su maneho, pa involukrá i duna partisipashon na tur persona òf organisashon ku ta relashoná ku e área òf e playa.

E stakeholders ku GMN a invitá tabata entre otro piskadónan di Sta. Cruz, Plataforma Banda Bou, Vishon Banda Abou (VIBA), Sentro di Bario Soto, Hòfi Mango, operadónan di hür jet ski, CARMABI, operadó di snack Sta. Cruz, Polis, ROP i CTB. Durante e reunión e stakeholders por a ekspresá nan deseonan ku tabata entre otro; traha pir nobo pa piskadónan, ku mester tene kuenta ku Sùitwèst i awa di áwaseru fuerte ku ta pasa via Sta. Cruz bai laman, konstruí un brùg chikítu pa por yega pabou di e binnenwater, pone fasilidatnan pa kompanianan di jet ski, mas vegetashon i pa keda  tene kuenta ku stakeholders.

A inventarisá tur e deseonan i e architekto por traha e diseño. E ta premirá ku e proseso aki lo tuma 2 luna, i ora e diseño nobo ta kla lo bai presentá e plan na e stakeholders. Pa medio di e método di trabou nobo aki, e maneho di Minister Pisas  tin komo meta pa GMN den estrecho koperashon ku stakeholders, yega na un diseño nobo ku ta wòrdu sostené dor di tur stakeholder i komunidat.

Potrèt 1. E stakeholders ta skuchando splikashon di architekto señor Lyongo Juliana (Pòrtrèt F. Dilrosun).
Potrèt 2. Señor Lyongo Juliana ta splika over di e trayekto pa yega na un diseño pa renobashon di Playa Sta. Cruz  (Pòrtrèt F. Dilrosun).