Deliberashon ku Gabinete Pisas III tokante e Programa di Gobernashon 2025–2029 “Beleidskeuzes voor een veerkrachtig, stabiel en volwaardig Curaçao”

Djamars, 31 di mart 2026, E reunion Públiko a kuminsá ku tratamentu ku di e promé punto di agènda “Dokumentonan ku a drenta”, sigui pa e di dos punto di agènda, ku ta aprobashon di nótulonan di reunionnan públiko di Parlamento, ku Miembronan di Parlamento a aprobá.

Seguidamente, a trata e di tres punto di agènda: deliberashon ku Gabinete Pisas III tokante e Programa di Gobernashon 2025–2029. Presidente di Parlamento sr. Fergino Brownbill a duna oportunidat na Gobièrnu pa presentá nan programa di Gobernashon.

Minister Presidente, sr. Gilmar Pisas, a kuminsá ku su presentashon di Ministerio di Asuntunan General. Esaki a wòrdu sigui pa presentashonnan di diferente ministerionan; Ministerio di Desaroyo Ekonómiko (sr. Roderick Middelhof); Ministerio di Hustisia (sr. Shalten Hato); Ministerio di VVRP (sr. Charles Cooper); Ministerio di Finansa (sr. Charles Cooper); Ministerio di BPD (sr. Shalten Hato); Ministerio di GMN (sr. Tyron Boekhoudt); Ministerio di SOAW (sra. Charetti America-Francisca) i Ministerio di OWCS (sr. Sithree van Heydoorn).

Na final di e presentashon, Presidente di Parlamento a habri e promé tanda di 20 minüt, pa duna Miembronan di Parlamento oportunidat pa hasi preguntanan òf disertashonnan na e ministernan presente.

Despues ku e ministernan a haña espasio, nan a regresá sala di Parlamento pa kontestá e preguntanan di e promé tanda.

Mesora a sigui ku e di dos tanda di 10 minüt, kaminda Miembronan di Parlamento a hasi algun pregunta adishonal i gradesí Gobièrnu pa e kontestanan. E ministernan a kontestá e preguntanan mesora.