Presentashon tokante masterplan di turismo na Konseho di Minister

Willemstad – Djárason, 8 di aprel 2026, Konseho di Minister a haña un presentashon tokante e trayekto pa yega na un masterplan di turismo nobo ‘Tourism Masterplan 2027-2032’. E masterplan di turismo aktual tabata pa e periodo 2022 te ku 2026 i esaki ta nifiká ku promé ku aña 2026 terminá e plan nobo mester ta klá i aprobá.

Durante e presentashon sr. Muryad de Bruin, direktor di Curaçao Tourist Board (CTB) i Robertico Croes, eksperto i konsehero den e trayekto pa yega na e masterplan di turismo nobo, a para ketu na e trayekto aktual. Ta importante i esensial pa komprondé i analisá tur dimenshon i sektor ku ta konektá na nos turismo.

Konseho di Minister a hasi un apelashon na Ofisina di Turismo pa analisá e Programa di Gobernashon 2025-2029 di Gabinete Pisas III i, kaminda ta nesesario, inkorporá elementonan for di e Programa di Gobernashon, p’asina sòru pa aliniashon. E faktor humano, e siudadano, ta keda sentral pa un i tur.

A palabrá ku den e di dos mitar di aña, despues di evaluashon, Ofisina di Turismo huntu ku Ministerio di Desaroyo Ekonómiko lo hasi un presentashon na Konseho di Minister tokante logronan i desaroyonan pa loke ta e aktual Masterplan di Turismo.