Florin karibense ta risibí otro premio internashonal 

 

Florin karibense ta risibí otro premio internashonal 

WILLEMSTAD / PHILIPSBURG – Centrale Bank van Curaçao en Sint Maarten (CBCS) ta anunsiá ku  florin karibense a risibí otro rekonosementu internashonal. International Bank Note Society (IBNS)  a skohe nos biyete di 200 florin komo ‘Bank Note of the Year 2025’. Na yüni 2025, CBCS a risibí un  rekonosementu kaba. Esei tabata pa e serie di biyete kompleto. I na mart di e aña akí, a bira konosí  ku CBCS a gana e premio Central Banking Currency Manager Award tambe, relashoná ku e  introdukshon eksitoso di florin karibense.  

Kada aña, IBNS ta otorgá e premio akí na e biyete mas distintivo na mundu for di e punto di bista di  diseño, inovashon i siguridat. Ta mas di shen biyete nobo a keda emití rònt mundu den 2025, pero ta  diesshete di nan so a keda nominá pa nan diseño inovativo. For di prinsipio di e votashon, tabata bisto  ku ta e biyete di 200 florin di Kòrsou i Sint Maarten tabata e faborito, loke ta hasi e rekonosementu akí  asta mas spesial. 

Segun IBNS, e premio akí ta rekonfirmá e kalidat i nivel di inovashon haltu di diseño di nos biyete. CBCS  ta mira e rekonosementu akí komo un konfirmashon di e trayekto ku a sigui pa yega na un moneda  moderno, sigur i apresiá internashonalmente. 

E kompetensia di IBNS ta konosí internashonalmente komo un indikadó importante di e nivel di diseño  di biyete. Si wak e otro ganadónan resien, ta bisto ku tantu e biyete su balor artístiko komo su nivel di  inovashon teknológiko ta faktor desisivo den e proseso di evaluashon. 

Promé finalista den e kompetensia akí tabata e biyete di 5 dòler di Fiji, ku ilustrashon di un para kulawai  i un turtuga di laman. Riba e di dos finalista, e biyete di 100 kwacha di Zambia, por mira un águila i dos  zjiraf. 

Willemstad, 22 di aprel 2025 

CENTRALE BANK VAN CURAÇAO EN SINT MAARTEN 

E fotonan ku a usa pa diseño di e biyete di 200 florin ta di Barbara Blom (kabai di awa) i  Berber van Beek (Brùg di Ponton). 

Impreshon di e biyetenan di florin karibense ta na enkargo di Crane Currency.