Youth Voices 2026 – Mi Ta Talento Pa Mi Pais

Mi Talento Pa Mi Pais – Youth Voices 2026 ta duna hóbennan un bos riba Dia di Bandera

Willemstad – Ministerio di Enseñansa, Siensia, Kultura i Deporte (ESKD) ta lansá un edishon nobo di Mi Talento Pa Mi Pais – Youth Voices 2026. Ku e trayekto nobo aki, hóbennan di Kòrsou ta haña e oportunidat pa desaroyá nan talento i laga nan bos resoná durante di un di e momentonan mas importante di aña.

Pa e edishon aki, mester a rediseñá e konsepto original. Den añanan anterior, Mi Talento Pa Mi Pais tabata un kompetensia kaminda diferente forma di arte i grupo di edat tabata partisipá. Awor, a skohe pa un enfoke mas spesífiko kaminda hóbennan ta haña oportunidat den ramo di kanto (Youth Voices 2026).

Youth Voices 2026 ta un trayekto pa desaroyá e talento di kanto ku enfoke riba hóbennan entre 12 i 25 den e forma di ekspreshon. E eskoho aki ta parti di un vishon mas amplio pa desaroyá e trayekto paso pa paso. Pa medio di un proyekto piloto ta enfoká i invertí mas den kalidat i profundidat. Na mes momentu, tin plan pa den futuro ekspandé e programa ku otro forma di arte manera baile i ‘spoken word poetry’ i tambe pa otro gruponan di edat, pa asina krea un plataforma mas amplio pa desaroyo di talento na Kòrsou.

Den Youth Voices, e enfoke no ta solamente riba talento, sino tambe riba kontenido. Hóbennan ta ‘keda invitá pa pensa riba nan relashon ku Kòrsou: kiko e isla ta nifiká pa nan, kiko nan ta sinti tokante nan idioma, nan kultura i nan identidat. E eksperensia personal aki ta forma e base di e proseso kreativo ku nan ta pasa huntu.

“Youth Voices ta un trayekto kaminda hóbennan no solamente ta desaroyá nan talento, sino tambe ta haña guia pa forma nan propio bos. ‘Voices’ pa nos no ta solamente kanta, sino kiko hóbennan ta sinti i pensa tokante Kòrsou — nan isla, nan idioma i nan identidat. Nos ta duna nan e instrumentonan nesesario i e esenario pa transformá esaki den un produkto kreativo ku ta bira tangibel i visibel.”

— Tamara Nivillac, lider di proyekt: Mi Talento Pa Mi Pais – Youth Voices 2026

Hóbennan por inskribí via website mitalentocw.com. E oudishon ta tuma lugá na kuminsamentu di mei, despues di kual un grupo selektá ta kuminsá ku e Talent Lab. E Talent Lab ta e kurason di e trayekto i ta dura dos luna, for di mei te ku kuminsamentu di yüli. Durante e periodo aki, e hóbennan selektá ta traha intensivamente ku coachnan, artista i profeshonalnan kreativo. Nan lo desaroyá nan bos, siña traha huntu i risibí guia den skibi i forma un produkshon musikal konhunto.

E trayekto ta terminá ku un momento spesial: un presentashon en vivo riba Plasa Brion riba 2 di yüli 2026, durante selebrashon di Dia di Bandera. Riba e dia aki, kaminda identidat i orguyo di Kòrsou ta sentral, hóbennan ta haña e oportunidat pa laga nan perspektiva keda presentá pa henter komunidat.

Ku Youth Voices, OWCS no solamente ta invertí den desaroyo di talento, pero tambe den e desaroyo di un generashon nobo ku ta konsiente di nan aporte den sosiedat.

Pa mas informashon i inskripshon:
 https://www.mitalentocw.com/
 mitalento.voices@gmail.com