KUERPO POLISIAL KÒRSOU 

KOMUNIKADO DI PRENSA

146/2026

2 mei 2026 

Deskonosínan ta pasa tira riba kas 

Djasabra 2 di mei 2026 alrededor di 03.06’or, Sentral di Polis a risibí informashon ku deskonosínan a pasa i lòs tirunan dirigí riba un kas den P.L.  Jansenstraat. 

Un unidat di warda di polis di Punda a keda dirigí pa e sitio. 

Na su yegada el a konstatá perforashonnan di bala den muraya dilanti di e kas  i tambe den e bentana. 

Dilanti di e kas polis a topa seis (6) kashi di bala. 

Afortunadamente ningun persona a keda alkansá den e tiramentu aki. Personal di reshèrshi a akudí na e sitio pa kuminsá ku e investigashon.