DISKURSO DI PROMÉ MINISTER GILMAR PISAS RIBA DIA DI REKUERDO DI ESNAN KU A PÈRDÈ NAN BIDA DURANTE SEGUNDA GUERA MUNDIAL 4 DI MEI 2026

Distinguido Invitadonan,
Kerido dama i kabayeronan,

Awe nos ta para ketu un biaha mas pa konmemorá un página skur den nos historia kompartí. Tur aña riba 4 di mei nos ta konmemorá tur esnan ku a pèrdè nan bida a konsekuensia di opreshon, violensia i guera, espesialmente durante e periodo di e di Dos Guera Mundial.

Nos ta hasi esaki ku rèspèt pa e dignidat humano di tur pueblo na mundu. Konmemorashon no ta un ritual limitá na pasado so, pasobra e ta rekerí di nos no solamente pa nos wak bèk so, pero pa tambe komprondé i rekordá kiko a pasa, pa ki motibu e la pasa, i ki aktuashon, aktitut f reflekshon esei ta eksigí di nos awe i pa futuro.

Mas ku ochenta aña pasá, e di Dos Guera Mundial a yega na su fin. E guera ei no solamente a kosta miónes di bida sino tambe a eksponé profundamente kon vulnerabel libertat, estado di derecho i dignidat humano ta. Loke nos no a sa di balorá, esta kombibensia ku esnan ku no ta meskos ku nos, a krea un katástrofe internashonal pa miónes di hende inosente i nan sernan kerí. E lès ei ta fundamental pa nos keda rekordá pa semper.

Kòrsou tambe a hunga un ròl importante den e di Dos Guera Mundial. Nos haf, nos refineria, i nos poblashon a kontribuí supstansialmente na e esfuerso di e Aliadonan bou di liderazgo di Merka pa terminá e guera. Pero nos envolvimentu tabata mas ku logístiko! E tabata parti di un lucha internashonal mas amplio pa salbaguardiá balornan sagrado, manera libertat, hustisia i dignidat humano.

Ta p’esei nos ta honrá di por forma parti di e komunidat internashonal ku tur aña di nobo riba e dia aki – 4 di mei – ta partisipá na un konmemorashon pa sigui asentuá e balornan sagrado ku mi a kaba di menshoná.

Pero lástimamente, ora nos wak rònt di nos awendia, nos ta mira un mundu un biaha mas karakterisá pa tenshon, konflikto i insertidumbre. Relashonnan internashonal mas i mas ta ser karakterisá dor di konflikto i divishonnan. Esaki tin konsekuensia pa paisnan, institushonnan demokrátiko, merkadonan internashonal i finalmente pa nos pueblonan. Nos region tambe no a keda ekskluí for di e desaroyonan aki. Konsekuentemente e dia aki tin mas balor ku nos mes ta realisá. E ta sirbi pa rekordá nos di kiko por pasa ora nos no duna “pas” i komprenshon mutuo un lugá prominente den nos relashonnan ku otro paisnan.

Si nos konmemorashon no ta pone nos reflehá riba pas i komprenshon mutuo, nos konmemorashon no ta alkansá su meta i lo ta insufisiente. Pasobra ta solamente ora nos reflehá riba e importansia di pas i komprenshon mutuo nos por yega na un aktuashon ku ta solidario ku otronan.

Ademas, den e kuadro aki, historia a siña nos ku libertat mester di protekshon, tantu di estado i komunidat internashonal, pa evitá ku esnan mas fuerte ta hasi mal uso di nan libertat pa trapa riba libertatnan i derechonan di esnan mas vulnerabel. Kaminda balornan i libertatnan sagrado ta wòrdu komprometé, nos mester aktua pa defendé e derechonan di esnan mas suak den nos komunidatnan. Komo Gobièrnu, nos ta kontinuamente konsiente di e responsabilidat aki. Ta p’esei e konfiansa ku pueblo a duna nos ta enserá e deber pa protehá nos estado di derecho, garantisá bon gobernashon, i fomentá un sosiedat den kua tin espasio pa tur rasa, religion i sekso i tambe pa diferensianan di opinion.

Esaki ta nifiká ku nos komo Gobièrnu mester sigui fortalesé e institushonnan ku ta sirbi interes públiko, pero tambe nos mester sigui invertí den formashon i edukashon di nos hendenan, den kreashon di oportunidatnan pa un i tur,i den protekshon di esnan mas vulnerabel den nos sosiedat, i di tal manera reforsá koheshon sosial bou di nos habitantenan. Pa un sosiedat fuerte i inklusivo, eseinan ta forma parti di un sistema di protekshon importante pa protehá e libertatnan esensial di tur siudadano di nos pais.

Na mes momento mester rekonosé ku e responsabilidat aki no ta solamente di Gobièrnu. E protekshon di e libertatnan esensial di kada persona ta un responsabilidat kolektivo, pero tambe un di kada persona individual. E responsabilidat aki ta rekerí un kompromiso sosial pa duna balor i rèspèt na kada unu di bo kosuidadanonan na interes i buena marcha di nos komunidat den su totalidat. E kompromiso sosial aki ta evitá ku nos diferensianan ta ser asentuá mas tantu ku loke nos tin komun. En bes di profundisá riba nos diferensianan, nos tin ku selebrá loke nos tin komun ku otro.

Bisando esei, mi ke rekordá nos pueblo awe ku kada un di nos ta karga un responsabilidat grandi pa sea mantené f vigilá mantenshon di e libertatnan esensial di tur nos habitantenan. Nos komportashon komo pueblo ta ser demostrá den e manera kon nos ta atendé ku e libertatnan di otronan  i kon nos ta forma nos sosiedat a base di e derechonan sagrado i libertatnan esensial di kada unu di nos. Esaki ta di importansia pa kada un di nos akshonnan, na kas, na skol, na trabou, den nos barionan i den lokalidatnan privá i públiko.

Ta hustamente p’esei ta importante pa nos sigui konmemorá riba e dia aki i kòrda e lèsnan di pasado – pa e siguiente generashonnan no ripití loke a pasa promé ku i durante e di Dos Guera Mundial. E lèsnan ei no ta bini di un historia apstrakto, pero di un realidat bibu ku mester sirbi komo un kompas di guia pa futuro generashonnan.

Dama i kabayero nan,

Un bes aki nos lo opservá dos minüt di silensio. Den e silensio ei, nos ta konmemorá esnan ku a pèrdè nan bida repentinamente durante e di Dos Guera Mundial. Kada aña di nobo, nos ta honra nan sakrifisio, pasobra nos ke rekonosé e preis ku a wòrdu pagá pa nos libertat. Pero den e mesun silensio ei tambe tin un tarea personal. E tarea di hasi nos mes e pregunta: kiko libertat ta nifiká pa mi i ki responsabilidat mi tin pa proteh’é pa ami i pa otronan? Den esaki ta importante pa konsiderá tambe ku konmemorashon ta un eskoho pa un mihó futuro sin deskriminashon, sin violensia i ku rèspèt pa e libertatnan di un i tur.

Masha Danki.