Bacuna i Advocaat hasiendo promé batida  CBCS ta honra klasifikashon históriko di Kòrsou pa Kopa Mundial  ku dos moneda konmemorativo 

PB2026-016 

Bacuna i Advocaat hasiendo promé batida  CBCS ta honra klasifikashon históriko di Kòrsou pa Kopa Mundial  ku dos moneda konmemorativo 

Willemstad/Philipsburg – Centrale Bank van Curaçao en Sint Maarten (CBCS) ta emití dos  moneda konmemorativo pa selebrá klasifikashon di selekshon di futbòl di Kòrsou pa Kopa  Mundial 2026. Ta trata di un moneda di plata di Cg 5,00 i un moneda di Cg 0,50 di kalidat pa  sirkulashon. Hungadó di mediokampo di selekshon di Kòrsou, Juninho Bacuna, i èks entrenadó  nashonal Dick Advocaat, kual su liderato a yuda Kòrsou klasifiká pa Mundial 2026, a hasi e  promé batimentu di e moneda konmemorativo di plata di Cg 5,00 awe mainta na Koninklijke  Nederlandse Munt na Houten. E moneda konmemorativo di Cg 0,50 a wòrdu produsí pa Royal  Canadian Mint. Ámbos moneda lo ta disponibel pa benta i sirkulashon desde fin di mei.  

Selekshon di futbòl di Kòrsou a skibi historia klasifikando pa Mundial 2026 pa promé biaha i komo  e pais ku ménos habitante ku a logra esaki. Ku e prestashon eksepshonal akí, Kòrsou a haña un  lugá den Guinness Book of Records tambe. Emishon di e monedanan konmemorativo ta forma  un tributo palpabel na e logro históriko akí. E monedanan ta sirbi komo un símbolo duradero di  orguyo nashonal i komo rekordatorio di e momento ku Kòrsou a pone su mes riba e mapa mundial  di un manera impreshonante. 

E dos monedanan ta mustra e ola fuerte na koló blou, siluetanan di e hungadónan komo tributo  na nan esfuerso i lucha, e streanan di bandera di Kòrsou ku ta reflehá nos identidat nashonal i, di  mes tambe e bala di futbòl – kurason di e logro históriko akí. 

Promé ku e seremonia, bosero di CBCS Nancy van der Wal a deklará:“Blue Wave no solamente a  konkistá e vèlt di bala; Blue Wave tambe a toka kurason di hopi hende i asta a drenta e portanan  di Banko Sentral. Mesora nos a disidí ku nos no por laga e momento akí pasa sin un rekuerdo permanente. P’esei CBCS a tuma inisiativa pa eternisá e okashon speshal akí ku dos moneda  konmemorativo.” 

E promé batimentu di e moneda a tuma lugá den presensia di Wouter Jansen, tim mènedjer di  Kòrsou na Federashon Futbòl Kòrsou (FFK), Kees Jansma, hefe di prensa di FFK, Bert van  Ravenswaaij, direktor i muntmeester di Koninklijke Nederlandse Munt, i Danielle Ranzijn, Senior  Project Manager na Koninklijke Nederlandse Munt. 

E moneda konmemorativo di plata di Cg 5,00 lo ta disponibel pa un preis di Cg 175,00. E moneda  konmemorativo di Cg 0,50 lo drenta den sirkulashon via e bankonan komersial na Kòrsou i banda  di esei lo ta disponibel den pakete spesial pa kolekshon na CBCS – un oportunidat úniko pa optené un rekuerdo duradero di e logro históriko akí. 

Bishitá wèpsait di CBCS pa mas informashon tokante disponibilidat:  

https://www.centralbank.cw/functions/banknotes-coins/caribbean-guilder-commemorative coins.  

Willemstad, 7 di mei 2026 

CENTRALE BANK VAN CURAÇAO EN SINT MAARTEN