Willemstad, 7 di mei, 2026 – Kasi 9 di 10 pashènt di neurologia na Curaçao Medical Center (CMC) mester di kuido agudo/kuido di emergensia kual ta afektá kon lihé otronan por wòrdu asistí. CMC ta mirando un kresementu den pashèntnan ku kondishonnan neurológiko severo. Esaki ta subi e preshon riba e servisionan i ta kousa tempu di espera mas largu pa kasonan ku no ta di emergensia.

Mayoria pashènt ku ta yega na departamentu di neurologia ta rekerí di atenshon urgente, manera kasonan di atake selebral òf otro kasonan agudo. E pashèntnan aki mester wòrdu yuda mesora. Simultáneamente e kantidat di pashènt ku ta bishitá poliklínika tambe ta sigui krese. Na 2025, konsultanan di neurologia a krese ku mas di 16%. Esaki ta demostrá un demanda mas haltu pa kuido spesialisá, kaminda mas kasonan kompliká ta wòrdu mirá kompará ku ántes.

Debí ku kasonan di emergensia ta wòrdu atendé promé, e demanda kresiente ta afektá e tempu di espera pa sitanan i proseduranan.

Un reto adishonal ta e flow di pashènt den hòspital. Un averahe di 25 pashènt ta médikamente kla pa sali for di hòspital pero ahinda ta warda siguiente pasonan den nan kadena di kuido, manera por ehèmpel lugá den un kas di hende grandi, lugá na ‘hospice’ òf tratamentunan na kas manera CAPD. Mientras ku e pashèntnan aki ta keda den hòspital, kamanan ta keda okupá kual ta limitá kapasidat pa hospitalisashon di pashèntnan nobo kual por kontribuí tambe na espera mas largu na departamentu di emergensia.

Mayoria di e kondishonnan neurológiko aktualmente tratá ta mará na malesanan króniko manera preshon haltu i diabétis. Na momentu ku e kondishonnan aki no wòrdu detektá i manehá na tempu nan por hiba na emergensianan médiko agudo.

CMC ta enfatisá ku esaki no ta solamente un problema di hòspital. Fortalesé prevenshon i mehorá tratamentu trempan via di dòkternan di kas i kuido basá den komunidat ta esensial pa redusí preshon riba servisio di hòspital.

CMC ta hasi un yamada na tur ‘partner’ pa traha huntu i mehorá prevenshon, reforsá kuido primario i sigurá ku pashèntnan ta risibí sosten ta tempu. Esaki lo yuda redusí preshon riba servisionan di hòspital i mehorá akseso i resultadonan pa tur pashènt.