Minister Boekhoudt ta firma akuerdo pa unifòrm nobo pa Servisio di Ambulans
Salubridat Públiko, Medio Ambiente i Naturalesa
Minister Boekhoudt ta firma akuerdo pa unifòrm nobo pa Servisio di Ambulans
Publiká riba 24 Mei 2026
Amsterdam, 22 di mei – Minister di Salubridat, Medio Ambiente i Naturalesa, Tyron Boekhoudt, a firma awe na Amsterdam un akuerdo ofisial ku UMCG Ambulancezorg B.V., komo titular di derecho di propiedat intelectual na nòmber di Stichting Instituut Ambulancezorg Nederland (AZN), pa uso di e unifòrm patentá di ambulans ku ta wòrdu usá na Hulanda.
Durante su bishita di trabou na Hulanda, minister Boekhoudt personalmente a risibí e promé unifòrmnan. Ku e paso aki, ta pone un base importante pa sigui profeshonalisá i modernisá servisio di ambulans na Kòrsou.
E akuerdo ta hasi posibel pa personal di ambulans di FKAK usa mesun unifòrm profeshonal ku ta wordu usá na Hulanda. Ku esaki no solamente ta invertí den un aparensia moderno i uniforme, pero tambe den mihó rekonosementu, seguridat i profesionalismo den asistensia di emergensia.
Segun minister Boekhoudt, e desaroyo aki ta bai hopi mas leu ku solamente unifòrm nobo.
“Personal di ambulans ta pará kla pa sirbi nos komunidat tur dia dinobo bou di kondishonnan hopi eksigente. Nan meresé no solamente apresio pero tambe e materialnan adekuá, rekonosementu i sosten profeshonal pa por ehersé nan trabou den un manera sigur i profeshonal. Esaki ta un invershon den nos kuido di salú i den e personanan ku tur dia ta hasi diferensia.”
FKAK lo kuminsá otro siman ku un grupo piloto di shete empleado. Basá riba e resultado nan di e tèst aki lo disidi si ta bai implementá e unifòrm nobo nan aki den 2027.
E introdukshon di e unifòrmnan nobo ta alineá ku e vishon mas amplio di minister Boekhoudt pa sigui fortifiká sektor di salú na Kòrsou dor di invertí den kalidat, profeshonalisashon, seguridat i kolaborashon internashonal. Durante su estadia na Hulanda, minister Boekhoudt a kombiná su partisipashon den diferente reunionnan ofisial ku bishitanan di trabou den sektor di kuido hulandes pa haña konosementu i eksperensianan ku por kontribuí na mehorashon di kuido na Kòrsou.
Ku e desaroyo aki, Kòrsou ta pone un otro paso konkreto den direkshon di un servisio di ambulans moderno, prepará pa futuro i ku un aparensia profeshonal.
