Promé Minister Pisas ta risibí delegashon di Organisashon Mundial di Komersio den kuadro di un miembresia independiente pa Kòrsou

Willemstad – entrante 3 di mart 2020 Kòrsou a bira miembro opservadó di Organisashon Mundial di Komersio (WTO). Pa bira un miembro independiente di e organisashon, mester hiba negosiashonnan ku e paisnan miembro di WTO riba un régimen di komersio ku ta kumpli ku e obligashonnan den e diferente akuerdonan di WTO, ku ta obligatorio pa e 164 miembronan di e organisashon.

Miembresia di WTO ta ofresé benefisionan signifikante pa Kòrsou. Un di e prinsipionan klave di WTO ta ku paisnan miembro ta mantené un régimen di komersio transparente i previsibel, kual tin ku garantisá ku komersio internashonal no ta enfrentá opstákulonan innesesario. Esaki ta fortalesé e posishon di Kòrsou komo partner komersial den transakshonnan internashonal i ta ofresé benefisionan partikularmente den área di eksportashon di produkto i servisionan di Kòrsou. Adishonalmente, reglanan di WTO ta sirbi internashonalmente komo un kuadro legal importante pa sera akuerdonan komersial ku otro paisnan.

E negosiashonnan pa bira miembro independiente di WTO ta tumando lugá denter di un grupo di trabou spesial den WTO, ku ta wòrdu presidí pa un embahador di un di e paisnan miembro. E grupo di trabou pa Kòrsou ta wòrdu presidí pa embahador Matthew Wilson di Barbados. Embahador Wilson i e sekretario di e grupo di trabou, Sr. Dimitar Bratanov, aktualmente ta hasiendo un bishita di trabou na Kòrsou e siman aki pa topa ku outoridatnan lokal i stakeholdernan enbolbí den e proseso di miembresia di WTO. Den e kuadro ei, nan a bishita Promé Minister Gilmar Pisas djarason 27 di mei 2026.

Tambe presente na e reunion tabata: e Minister di Finansa, Sr. Charles Cooper; e Minister di Desaroyo Ekonómiko, Sr. Roderick Middelhof i e Negoshadó Prinsipal di Kòrsou, Sr. Caryl Monte. Durante e reunion a enfoká riba e proseso pa bira miembro di WTO, e ruta pa yega na miembresia independiente i e responsabilidatnan di e diferente ministernan i instansianan gubernamental den Gobièrnu di Kòrsou pa loke ta trata ehekushon di e obligashonnan den e tratado di WTO. Durante e reunion embahador Wilson a ekspresá su konfiansa den e progreso di e proseso i a indiká ku e lo hasi su máksimo esfuerso pa Kòrsou por drenta WTO komo miembro independiente den un periodo di mas o ménos dos aña.

Promé Minister Pisas ta mira miembresia independiente di WTO komo un paso importante den e strategia pa sigui fortalesé e posishon ekonómiko di Kòrsou internashonalmente i pa desaroyá un régimen di komersio moderno aki na Kòrsou ku ta kuadra ku desaroyonan den ekonomia mundial.