Prome Minister Mike Eman: Un Aruba limpi ta responsabilidad di nos tur awor cu Zona di Desperdicio a bira un realidad.

Dialuna mainta, luna di juni rib’e siman unda mundo henter ta para keto pa Dia Mundial di Medio Ambiente, Aruba a habri cu un tremendo noticia. Den colaboracion entre Gobierno di Aruba, Aruba Tourism Authority (ATA), Ministerio di Turismo, Transporte y Labor bou guia di Minister mr. Wendrick Cicilia y Ecotech Aruba N.V. ta pone un solucion structural pa nos comunidad deshaci di sushi. Cu inauguracion oficial di e iniciativa Aruba Limpi, e proyecto Zona di Desperdicio, Aruba a duna un paso importante den direccion di un isla mas limpi, bunita y agradabel pa biba y bishita.

Durante e ceremonia oficial na Ecotech na Barcadera, Prome Minister mr. Mike Eman a enfatisa e importancia di e proyecto pa trece mehora den calidad di bida di nos comunidadnan y ofrece un solucion practico pa un necesidad cu hopi famia ta enfrenta. E discurso tabata memey di diferente invitado, e.o. Ronella Croes, CEO di ATA, Minister Cicilia, representantenan di ATA mes como tambe Ministerio di Asunto General, Medio Ambiente, Naturelsa y Cultura, Ministerio di Turismo, Transporte y Labora, varios ehecutivo di Ecotech, como tambe personal di Bureau City Inspector.

Segun Eman, pa hopi ciudadano e costo y dificultad di deshaci di sushi ta representa un reto real. Cu e proyecto Zona di Desperdicio, e residentenan ta haya un alternativa accesibel y practico pa deshaci di sushi di un manera responsabel, contribuyendo directamente na limpiesa di nan cas, bario y comunidad. “Hopi famia ta haci gran sacrificio pa cubri nan gastonan diario. Ora cu un persona mester asumi gasto adicional pa deshaci di desperdicio, esey por bira un carga extra den nan cartera. Cu iniciativa aki nos ta crea un solucion practico cu ta contribui na dignidad y calidad di bida di nos pueblo,” Prome Minister Eman a declara. E proyecto Zona di Desperdicio ta sigui riba e impulso crea door di e diferente edicion di Baki den Bario organisa durante e ultimo aña rond di varios bario riba nos isla. E actividadnan ey a demonstra claramente e deseo di nos comunidad pa contribui activamente na un entorno di nos isla mas limpi, mas sigur y cu miho calidad di bida. “Nos a mira durante Baki den Bario con nos pueblo a responde cu entusiasmo y compromiso. Esey ta confirma cu ora gobierno y comunidad traha hunto, resultado positivo ta sigui. Zona di Desperdicio ta construi riba e mesun espirito di cooperacion y responsabilidad comparti,” Eman a expresa.