Parlamento di Kòrsou Ora di Pregunta (Vragenuur) den Parlamento tokante “Limpiesa i Mantenshon di Kòrsou” i “Eksploshon i kandela ku produkto kímiko ku ta pone salú públiko i seguridat di gran parti di Kòrsou na peliger”

Djaweps, 11 di yüni 2026, Minister di Salubridat Públiko, Medio Ambiente i Naturalesa, sr. Tyron Boekhoudt, a presentá den sala di Parlamento pa kontestá preguntanan relashoná ku e tópikonan ariba menshoná.

E petishon pa e Ora di Pregunta tokante “Limpiesa i Mantenshon di Kòrsou” a wòrdu hasí dor di Miembro di Parlamento, sr. Gilbert Doran. E Ora di Pregunta a kuminsá ku e preguntanan formulá dor di sr. Doran, despues di kua Presidente suplente di Parlamento, sr. Juniël Carolina, a duna oportunidat na Minister Boekhoudt pa duna su kontestanan.

Despues di e kontestanan di Gobièrnu, Presidente suplente a duna Miembronan di Parlamento oportunidat pa hasi preguntanan adishonal riba e tópiko.

Seguidamente, a trata e di dos tópiko, “Eksploshon i kandela ku produkto kímiko ku ta pone salú públiko i seguridat di gran parti di Kòrsou na peliger”, pidí dor di Miembro di Parlamento, sra. Giselle Mc William. Despues ku sra. Mc William a lesa su preguntanan, Minister Boekhoudt a duna kontesta riba e diferente preguntanan.

Presidente suplente a habri e oportunidat pa Miembronan di Parlamento hasi preguntanan adishonal i duna remarkenan relashoná ku e tópiko. Minister Boekhoudt a kontestá e preguntanan hasí.

Na final di e kontestanan, Presidente suplente di Parlamento, sr. Juniël Carolina, a sera e enkuentro.