Aruba ta conoci pa su bunita dianan di solo cayente y biento fresco, pero e mesun clima semi-arido aki ta haci nos vulnerabel. Den e ultimo añanan, nos a nota periodonan di secura mas largo y temperaturanan mas halto. Esey ta pone cu e  capa fertil di e suela ta seca y ta bira vulnerabel pa erosion—sea pa via di e biento fuerte of pa via di e poco awacero fuerte cu de bes en cuando ta cay y ta lastra e tera bay cun’e.

E degradacion aki di nos suela tin consecuencia directo pa nos tur. E tin impacto riba:

• Nos Biodiversidad: Nos flora y fauna unico, manera nos matanan endemico y bestianan cu ta depende di otro, ta perde nan habitat natural y nan fuente di cuminda.

• Siguridad di Cuminda: un suela debilita y degrada ta haci agricultura hopi mas dificil y ta aumenta nos dependencia riba importacion di productonan pa consumo.
• Salud y Bienestar: Un suela seco ta crea mas stof, locual por afecta e calidad di aire y ta empeora condicionnan respiratorio pa e ciudadano.

Combati secura y proteha e suela no ta un tarea di gobierno of instancianan so. E ta un tarea di cada habitante. Solidaridad cu nos medio ambiente ta cuminsa na cas.

Ata aki algun ehempel practico con nos por aporta na e e bienestar di e suela: 

• Uza Awa Conscientemente: Optimalisa e uzo di awa na cas. Reuza awa di laba paña of laba tayo pa muha mata, scoge pa drip system den hardin.
• Planta Mata: Matanan endemico cu ta resistente na e clima seco di Aruba. Nan tin mester di menos awa y nan reisnan fuerte ta yuda mantene e structura di e suela cu ta evita erosion.
• Aplica ‘Mulching’ (Capa di Proteccion): Tapando e suela rond di bo matanan cu un capa di blachi seco, of compost, ta yuda mantene e humedad den tera pa mas tempo y ta evita cu solo ta seca e suela completamente.
• Practica ‘organic composting’: Crea bo mesun compost na cas cu restonan di cuminda organico. Esaki ta enrikece e suela, mehora su capacidad pa retene awa y ta yuda na reduci desperdicio.

“Un suela saludabel ta e fundeshi pa un Aruba resiliente. Pa medio di ahustacionnan chikito den nos mesun bario y hardin, nos por combati e efectonan di secura y garantisa un futuro berde pa e proximo generacionnan.”

Ban uni forsa pa cuida nos tera, conserva nos recurso di awa y mantene nos isla fuerte contra e cambionan di clima.