Den un ambiente internashonal yen di insertidumbre  CBCS ta mantené un maneho monetario prudente 

Den un ambiente internashonal yen di insertidumbre 

CBCS ta mantené un maneho monetario prudente 

WILLEMSTAD/PHILIPSBURG – Dia 18 di yüni 2026 Centrale Bank van Curaçao en Sint Maarten  (CBCS) a tuma e desishon di mantené su maneho monetario sin kambio. E desishon aki ta basá  riba dos konsiderashon. Di un banda, e union monetario ta sigui benefisiá di un posishon  eksterno sólido ku reserva bruto di divisa sufisiente pa kubri mas di sinku luna di importashon.  Di otro banda, e insertidumbre persistente tokante desaroyonan den Medio Oriente i e posibel  efektonan di esaki riba merkadonan di materia prima i finansiero i e posibel konsekuensianan  pa e union monetario, ta hustifiká un aserkamentu prudente. Konsiderando e diferente  desaroyonan aki, a disidí pa mantené e maneho monetario sin kambio, loke ta konsistente ku  e desishon ku Federal Reserve (Fed) di Estádos Unídos a tuma na luna di yüni pa mantené su  tasa federal na mesun nivel. CBCS lo sigui monitoriá e desaroyonan lokal i internashonal di  serka i ta pará kla pa ahustá su maneho monetario ora ku esaki ta nesesario.  

Apesar di un panorama mundial mas desafiante i oumento den volatilidat den merkadonan  finansiero, reserva ofisial bruto a sigui krese fuertemente den 2026. Despues di un oumento di Cg  402,4 mion den 2025, reserva ofisial bruto a oumentá ku Cg 485,0 mion te ku 1 di yüni 2026.  Komo resultado, kobertura di importashon a keda kómodamente riba e norma di tres luna i a yega  na 5,5 luna na fin di mei 2026. Ta spera ku e posishon eksterno lo keda sólido durante sobra di  aña, ku kobertura di importashon proyektá na 5,3 luna na fin di 2026 i reserva ofisial bruto ku lo  oumentá ku Cg 302,2 mion durante di aña. 

No opstante e posishon eksterno sólido di e union monetario, e perspektiva ta sigui suheto na riesgonan konsiderabel, partikularmente for di eksterior. E konflikto den Medio Oriente ta sigui  representá un riesgo pa e kadenanan mundial di suministro i e rutanan komersial, loke no  solamente por resultá den preisnan mas haltu di energia, sino tambe den oumento di primanan di  seguro i gastunan di transporte marítimo. Aunke e akuerdo entre Estádos Unídos i Iran, ku a wòrdu anunsiá resientemente, por yuda redusí e riesgonan akí i resultá den preis promedio di petroli mas  abou ku a spera anteriormente, e situashon ta keda frágil i insigur. Den un ambiente di riesgonan geopolítiko elevá, preis internashonal di petroli por keda haltu pa un periodo prolongá, loke por  oumentá e kosto total di importashon di e union monetario i pone preshon riba reserva ofisial  bruto pa motibu di salida mas grandi di divisa. 

Banda di e desaroyonan den Medio Oriente, otro tenshonnan geopolítiko, inkluyendo e guera na  Ukrania, ta sigui kontribuí na e insertidumbre mundial. Ademas, insertidumbre tokante maneho  komersial mundial, ku disputanan di tarifa i prosesonan legal ku ta andando, ta redusí e grado di  sertesa i ta pone invershonnan i aktividat ekonómiko bou di preshon. Na mes momento, preshon  inflashonario adishonal komo konsekuensia di e oumento di preis di materia prima por prolongá 

e periodo di maneho monetario restriktivo na Estádos Unídos, ku posibel reperkushonnan pa  kondishonnan finansiero mundial i kresementu ekonómiko. 

E riesgonan akí ta hustifiká un maneho monetario prudente i ta sostené e desishon di mantené e  maneho monetario di CBCS den mesun liña ku esun di Fed, mirando ku e florin karibense ta mará  na dòler merikano. Dia 17 di yüni 2026, Fed a mantené su tasa federal na 3,50% te 3,75%, debí na  preshon inflashonario persistente i insertidumbre elevá relashoná ku e perspektivanan ekonómiko.  Den e konteksto akí, CBCS a disidí di mantené su tasa di interes ofisial (‘beleningsrente’) sin kambio  na 4,25%, manteniendo asina un diferensia di 50 punto básiko riba e tasa federal. 

Finalmente, CBCS a mantené e porsentahe di reserva obligatorio na 18,50%, pa motibu di e ekseso  persistente di likides den e sektor bankario. Tambe lo sigui ofresé sertifikado di depósito (CD) na tasa atraktivo na e emishonnan semanal pa stimulá bankonan pa mantené mas likides lokalmente  i asina yuda salvaguardá e union monetario su posishon di divisa. E desishonnan akí ta respaldá pa  e posishon sólido di divisa di e union monetario i ta reflehá un aserkamentu prudente, orientá riba  futuro, den un ambiente mundial yen di insertidumbre. 

Willemstad, 19 di yüni 2026 

CENTRALE BANK VAN CURAÇAO EN SINT MAARTEN