Parlamento di Kòrsou ARROWHEAD STADIUM, KANSAS CITY, KORSOU KONTRA ECUADOR

Ku gran honor i orguyo pa nos pais Presidente di Parlamento di Kòrsou, sr. Fergino Brownbill, a presensia e di dos partido di e ekipo nashonal di futbòl Kòrsou kontra Ecuador na Kansas City, Merka. Kòrsou a bolbe bria i gana kurason i rèspèt di hopi hende rònt mundu. Un pabien na nos ekipo i pueblo di Kòrsou ku nos promé punto den Kopa Mundial i un prestashon EKSEPSHONAL di kiper, Eloy Room.

Promé ku inisio di partido Presidente di Parlamento tabatin oportunidat pa saludá i hiba palabra ku SU Mahestat Rei Willem-Alexander ku tabata presente na e wega di Kòrsou huntu ku Reina Maxima i Prinsesa Ariane. Mas aleu Presidente di Parlamento a sera konosí i hiba kombersashonnan interesante ku algun mandatario i dignatario ku a bai e wega pa apoyá Kòrsou. Entre nan tabatin:

“Governor” di Missouri, sr. Mike Kehoe;

“Mayor” di Kansas City, sr. Quinton Lucas;

Kònsùl General di Reino na Chicago, Merka, sr. Eric Strating; i

Miembro di Kongreso merikano, sr. Tracey Mann.

Tabata un plaser pa Presidente di Parlamento sera konosí ku miembro di Kongreso Merikano sr. Tracey Mann pa e promé distrito di Kansas. A kombersá riba logro di nos selekshon, desaroyonan na pais Kòrsou i alabes áreanan ku por kolaborá ku otro na nivel legislativo. Entre otro riba un relashon struktural manera Aruba konosé ku e Kongreso.