E festival, organisa den colaboracion cu Fundacion Savaneta Prome Capital y diferente partnernan publico y priva, a bira un plataforma importante pa promove e sector di pesca local, stimula actividad economico y celebra e identidad unico di Savaneta como pueblo di pesca.

E organisadornan y partnernan involvi a comparti e vision pa e edicion di e aña aki, cu lo sigui elabora riba e exito di e aña anterior. Bishitantenan por spera un amplio oferta di seafood local fresco, preparacion culinario creativo, entretenemento cultural, musica live, artesania local y diferente actividad pa henter famia.

E festival ta representa hopi mas cu un evento recreativo. E ta un instrumento concreto pa fortalece e sector primario, crea oportunidadnan economico pa piscadornan, comerciante y empresarionan local, y mustra e valor y importancia di produccion local den e desaroyo sostenibel di Aruba.

“Savaneta Seafood Festival ta mustra con nos sector primario por bira un motor importante pa desaroyo economico. Ora nos ta promove nos piscadonan, nos producto local y nos cultura, nos no solamente ta creando actividad economico, pero tambe nos ta preservando un parti esencial di nos identidad como pueblo. E festival aki ta un ehempel concreto di con colaboracion entre comunidad, sector priva y gobierno por genera resultado positivo pa Aruba,” Minister Minister di Finansa, Asunto Economico y Sector Primario, mr. Geoffrey Wever a expresa.

E festival ta  alinea cu e prioridadnan di gobierno pa fortalece sector primario, apoya  comercio local, diversifica economía y crea oportunidad pa empresario- y productornan local.

“Nos meta ta pa sigui construi riba e fundeshi cu a wordo poni den añanan pasa. Savaneta tin tur e potencial pa consolida su posicion como capital di pesca di Aruba. Un evento manera Savaneta Seafood Festival ta trece nos mas cerca na e obhetivo ey, creando oportunidad pa nos piscadonan, promoviendo consumo di producto local y fortaleciendo e economia di nos comunidadnan,” Minister Wever a agrega.