Ruben Croes ta preparando team di asistencia medico den siguiente fase di ayudo humanitario pa Venezuela

Cu varios decada di experiencia den cuido medico y atende cu situacion medico den tempo di un calamidad, e nurse Ruben Croes ta preparando e siguiente fase di e asistencia medico cu Aruba lo por brinda na Venezuela. Su amplio experiencia den diferente mision internacional ta forma un parti importante di e apoyo cu Aruba ta ofrece despues di e fuerte temblor cu a sinti den region di La Guaira. Croes a explica cu e prome ekipo cu a sali lo determina e necesidadnan den e area afecta. Riba base di nan informacion, e siguiente ekipo medico lo por wordo activa. “Nos ta depende di e informacion cu e prome ekipo lo trece bek. Nan ta haci e evaluacion y, a base di esey, nos lo prepara e siguiente ekipo medico.”

Durante su trayectoria, Croes a participa den diferente mision internacional, incluyendo varios biahe den tempo di calamidad na Haiti, Colombia, Sint Maarten y otro pais cu a wordo afecta pa calamidad. E experiencia ey ta permiti cu Aruba por mobilisa lihe ora emergencia manera esaki sosode. “Mi a bay Haiti cinco biaha y tambe na otro paisnan. Esaki a duna nos hopi experiencia den atende desaster.” Segun Croes, a pesar cu Aruba ta un pais chikito, e nivel di preparacion y experiencia di su profesionalnan ta comparabel cu hopi ekipo internacional. “Nos tin un experiencia cu hopi pais, inclusive pais grandi, no semper tin. Nos a traha hunto cu ekipo internacional manera Belgian First Aid and Support Team (B-FAST) di Belgica, Urban Search and Rescue Nederland (USAR-NL) y otro grupo grandi. Esaki a duna nos hopi conocemento riba e tereno.”

E siguiente ekipo cu lo eventualmente prepara lo por consisti di doctor, nurse y personal di sala di operacion, cu lo brinda cuido medico specialisa segun e necesidadnan cu e prome ekipo identifica. Croes a destaca cu e forsa di Aruba no ta solamente den conocemento tecnico, sino tambe den e compromiso humano di su profesionalnan. “E parti humano ta hopi importante pa nos. Nos tin e deseo di yuda y e experiencia cu nos a acumula ta permiti cu nos por haci un diferencia real.” Segun Croes, e capacidad di Aruba pa mobilisa su profesionalnan cu experiencia internacional ta demostra cu e isla ta cla pa brinda apoyo no solamente na nivel local, pero tambe den emergencia den nos region.

E participacion di e profesionalnan medico den e mision humanitario aki a bira posibel danki na e coordinacion entre Gobierno di Aruba, Crisis Management Office (CMO) y Cruz Cora Aruba. Bou di liderazgo di Prome Minister Mike Eman, asina Aruba a logra moviliba rapidamente su conocemento, experiencia y capacidad pa brinda asistencia na e pueblo Venezolano den un momento di necesidad grandi.