Conseho di Minister aproba pa aloca e suma aki den presupuesto y despues Parlamento di Aruba a  autorisa Minister Wever pa pa haci e prestamo aki.

E decision aki ta bay hopi mas leu cu un inversion den infrastructura di refineria. E towernan industrial ta den un estado cu ta representa un riesgo serio pa e operacionnan di RDA. Si no elimina nan na tempo, tin un peligro real cu nan por cay den otro, cu por obstaculisa seriamente e sistema di suministro di combustibel cu Aruba ta depende riba dje pa genera electricidad. Esaki ta haci e proyecto un asunto di siguridad energetico nacional y un condicion indispensabel pa mantene nos economia funcionando.

Minister Geoffrey Wever a indica cu un gobierno responsabel mester actua proactivamente ora interesnan esencial di e pais ta den wega.

“Nos no por permiti cu Aruba ta confronta un situacion unda un riesgo industrial por afecta nos suministro di combustibel y, como consecuencia, nos produccion di energia. Siguridad energetico ta un fundeshi pa nos economia y pa calidad di bida di nos pueblo,” Minister Wever a comenta.

Gobierno a constata cu RDA no tabata dispone di e recurso financiero necesario pa por financia e inversion urgente aki cu su propio medio. Sin intervencion di Gobierno, RDA lo mester recupera e costo di e inversion aki door di aumenta su groothandelsmarge. Eventualmente, esaki lo a resulta den prijsnan mas halto pa gasolin y diesel pa ciudadano y comerciante, cu posteriormente lo a sinti esaki den e costo di transporte, distribucion y finalmente den prijs di productonan y servicio na Aruba.

Door di tuma e decision pa financia e proyecto, Gobierno ta evita cu ta transferi e costo di e inversion directamente na e consumidor. Esaki ta forma parti di e maneho di gobierno pa proteha e poder di compra di nos ciudadanonan y limita presion inflacionario na un momento cu costo di bida internacionalmente ta sigui bou di presion.

“Cada decision financiero cu Gobierno ta tuma mester finalmente traduci den beneficio pa pueblo. Cu e acuerdo aki nos no solamente ta elimina un riesgo pa nos infrastructura energetico, pero nos ta evita cu e ciudadano ta termina pagando e costo via prijsnan mas halto. Asina nos ta proteha e poder di compra di cada famia Arubiano.”

Diferente na un prestamo convencional, e acuerdo ta impone condicionnan rigoroso cu ta fortalece e posicion di Gobierno durante henter e periodo di financiamiento. E inversion lo tuma luga solamente despues cu a  cumpli cu tur condicionnan tecnico y legal.

Ademas, Gobierno a retene e derecho pa, si e interes publico ta exigi esaki, converti e prestamo total of parcialmente den un inversion di capital den RDA. Esaki ta duna Pais Aruba un instrumento adicional pa proteha patrimonio publico y mantene control strategico riba e inversion.