Diskurso di Promé Minister Gilmar Pisas riba Dia di Bandera 2026

Brionplein, 2 di yüli 2026: Diskurso di Promé Minister Gilmar Pisas riba Dia di Bandera 2026

Su Ekselensia Gobernador di Kòrsou, señor Mauritsz de Kort,
Honorabel Presidente di Parlamento, señor Fergino Brownbill,
Honorabel Parlamentarionan,
Kolega Ministernan,
Miembronan di nos kuerponan uniformá,
Demas invitadonan,
Kerido pueblo di Kòrsou,

Ta un gran honor pa para awe mainta aki den boso presensia. Tin algun kos den bida ku no por ser midí ku sifra. Ni ku balor material.
Pasobra tin momentunan ku ta tuma un lugá speshal den kurason di un pueblo. Momentunan ku ta hasi nos laga tur diferensia un banda. Momentunan ku ta rekordá nos ku, sin importá unda nos ta biba, kiko nos ta hasi, òf for di kua bario nos ta bini, nos ta pertenesé na e mesun pueblo. Na e mesun nashon. Awe nos no ta selebrá solamente un símbolo. Awe nos ta selebrá nos Himno i bandera.
Mi ta pidi boso: hisa boso kara. Wak nos bandera. Wak’e bon!

Kiko ta hasi ku e no ta simplemente un pida paña blou ku dos strea hel riba dje? Nos bandera no ta solamente loke nos por mira. E ta prinsipalmente loke nos ta sinti ora nos mir’e. Den dje nos ta mira nos identidat. Nos idioma. Nos kultura. Nos norma i balornan. Nos tradishonnan. Nos famianan. Nos barionan. Nos fe den e grandesa di nos nashon, kon chikitu ku nos pais mes ta.
Nos bandera ta konta un historia. Nos historia. No di un pais so, sino di nos pueblo. Un pueblo ku a konosé desafio, sakrifisio, momentunan difísil, pero ku nunka no a laga su speransa pa un mihó mañan muri. Un pueblo ku nunka ta entregá!

Promé ku mundu a konosé nos, tabatin hendenan ku tabata sembrando simianan pa e futuro den silensio, asta ora nan mes no tabata sigur si nan lo mira e fruta. E no tabata fásil pa nan. Pero nan tabatin fe. I awe nos ta pará riba e fundamentu ku nan a laga atras.
Ora nos bandera ta bula den laira, e no ta puntra nos di kua bario nos ta, ki fam nos ta karga, ni ki nos opinion ta. E ta rekordá nos di un bèrdat ku nos no mester lubidá hamas: ku promé ku tur otro kos, nos ta Yu di Kòrsou.
E blou ta rekordá nos di e laman i e shelu ku nos tur ta kompartí. E hel ta e solo, e kalor den nos kurason ora nos papia di Kòrsou. I e dos streanan ta rekordá nos di nos isla, chikí den tamaño pero grandi den kurashi, resiliensia i fe.

Pasobra, al fin i al kabo, nos bandera no ta representá solamente un pais. Nos bandera ta representá e kurason di Kòrsou.

Mi kerido pueblo,
Tin biaha den historia di un pueblo, un solo momentu ta kambia e manera ku un pueblo ta mira su mes. Mi ta kere ku e aña aki, nos tur a eksperensiá un momentu manera esaki. Mi no sa unda bo tabata: den stadion, na kas, na trabou, òf leu den eksterior. Pero un kos ta sigur: nos tur a mira e mesun imágen. Nos bandera, pa promé biaha den historia, habrí grandi riba e esenario di mas grandi den mundu di futbòl.

Ta pesei promé ku mi sigui, mi ke ekspresá na nòmber di pueblo di Kòrsou nos mas profundo gradisimentu na nos Selekshon Nashonal pa e regalo ku boso a duna nos nashon. Boso a hasi mas ku hunga futbòl. Boso a laga un pueblo henter laga su kurason bati den un solo ritmo. Boso a hasi nos yòra, selebrá, spera i mas importante ainda, kere. Kere den nos Himno i bandera. Kere den nos pueblo. Kere den Kòrsou. Danki di Kurason na nos Selekshon Nashonal

Pero si bo puntra mi kiko tabata e kos di mas speshal di tur loke nos a biba, mi lo bisa esaki: E kos di mas speshal tabata ku nos pueblo a mira su mes. Nos a mira nos muchanan ku ta soña grandi. Nos a mira nos mayornan ku a sakrifiká pa laga nos yega te einan. Nos a mira nos bario, nos historia, nos futuro den un solo bandera.

E momentu ei no tabata solamente tokante futbòl. E tabata tokante un pueblo chikí ku a demostrá hinter mundu ku grandesa no ta midi den tamaño, sino den kurashi, resiliensia i determinashon.
Mundu no a siña solamente unda Kòrsou ta riba mapa. Mundu a siña ken nos ta. I aki na Kòrsou, e ola blou ku a pasa den nos kayanan, nos kasnan i nos barionan, a rekordá nos di un kos: ora Kòrsou ta kere den su mes, nos por move komo un solo pueblo. Talbes esei ta e regalo di mas grandi ku e Mundial a laga pa nos: nos pueblo a redeskubrí kiko nos bandera realmente ta nifiká.

Mi kerido pueblo di Kòrsou,
E momentu ku nos a biba e aña aki no por keda solamente un rekuerdo bunita, un historia, un video. E mester bira un kompas. Un kompas ku ta guia nos den e manera ku nos ta biba, traha i sigui konstruí Kòrsou.
Pasobra e berdadero balor di un bandera no ta den e momentu ku nos ta selebr’é. E balor ta den loke nos ta hasi despues.
Si nos por uni rondó di un soño deportivo, nos por uni tambe rondó di un soño nashonal. Si nos por lanta un ola blou pa nos selekshon, nos por lanta tambe un ola blou pa nos edukashon, nos muchanan, nos salubridat, nos ekonomia, nos bario, nos futuro, nos nashon!

Awe nos ta marka un komienso nobo! For di awe, 2 di yüli 2026, nos ta habri un etapa nobo pa Kòrsou: un etapa di Nation Building, di konstrukshon di nos nashon. No komo un slogan. No komo un programa di Gobièrnu so. Pero komo un tarea, un mishon di nos tur.

Nation Building ta nifiká ku nos ta konstruí un Kòrsou kaminda nos muchanan por soña grandi i haña oportunidat pa realisá nan soño. Kaminda nos hóbennan no mester sinti ku nan futuro ta leu for di nan isla. Kaminda nos pueblo por biba ku dignidat meimei di tur nashon na mundu.

Esaki ta nifiká ku nos mester bolbe kere den nos mes. Den e forsa di nos pueblo. Ku Kòrsou por. I ku Kòrsou mester sigui desaroyá den e mihó direkshon posibel. E tarea aki no ta fásil. Pero e mihó kapítulonan den historia di un pueblo semper a nase for di desafionan.Tur kos ku tin balor ta pidi sakrifisio, perseveransia, union i amor.

Awe laga nos hasi un promesa no solamente na nos mes, pero na e generashonnan ku lo bini despues di nos tambe: ku nos lo sigui traha duru pa un Kòrsou kaminda union ta mas fuerte ku diferensia, kaminda speransa ta mas fuerte ku inseguridat, kaminda e bandera ku nos a hisa awe, ta nos guia pa progreso den futuro.

Mi kerido pueblo,
Nos ta honra nos bandera ora nos trata otro ku rèspèt, ora nos yuda un hende den nesesidat, ora nos traha ku integridat, ora nos pone Kòrsou promé.

Despues di tur loke nos a eksperensiá huntu e aña aki, nos sa un kos sigur: ounke nos bandera ta e mesun bandera ku nos a konosé semper, awe nos kurason ta dun’é un sintimentu nobo. Ban konstruí un Kòrsou nobo, ban konstruí un nashon nobo pa yunan di Kòrsou.
No laga e ola blou keda solamente den stadion di futbòl na Merka. Laga e basha drenta nos skolnan, nos kasnan, nos empresanan, nos barionan, nos Gobièrnu, i bira un movementu di pueblo i di amor pa nos patria.

Nos ta un pueblo chikí den tamaño, pero nos no ta chikí den alma. Un pueblo ku, ora e ta uní, ta hasi kosnan grandi. Awe, bou di nos bandera, laga nos sigui kere. Sigui traha. Sigui konstruí e pèrla aki den Karibe.

Dios sigui bendishoná nos bandera. Dios sigui bendishoná Kòrsou.
Biba nos bandera! BIBA KÒRSOU!