AMAK TA DESPIDÍ UN LEYENDA: BOY WOUT 

 

AMAK TA DESPIDÍ UN LEYENDA: BOY WOUT 

Willemstad, Kòrsou – Ku hopi tristesa, AMAK (Asosiashon di Musiko i  Artista di Kòrsou) a risibí e notisia di fayesimentu di Boy Wout, un di e  figura musikal mas influensial ku Kòrsou i e Antianan Hulandes a konosé. Pa mas di 60 aña, Boy Wout a dediká su bida na músika. Ku su bos úniko, su  guitara i su karisma natural, el a logra toka kurason di generashonnan  entero. E tabata un artista ku no solamente a entretené su públiko, sino ku  a uni hende di tur edat i tur estrato sosial dor di su músika. Boy Wout lo keda pa semper ligá na historia di The Three Voices, un grupo  vokal ku a laga un marka profundo den desaroyo di músika popular di  Kòrsou. Ku e grupo ei i tambe den su karera personal, el a kontribuí  enormemente na nos patrimonio kultural. 

Te den su últimonan añanan, Boy a sigui hasi loke el a stima mas: kanta pa  su públiko. Su presentashonnan na diferente lokalidat, inkluí Rust & Burgh,  tabata testimonio di un artista ku nunka a pèrdè e pashon pa músika ni pa e  hende ku semper a sostené dje. 

Boy Wout no tabata solamente un kantante òf músiko. El tabata un  embahadó di alegria, amistat i amor pa músika. Hopi di nos lo keda  rekordando su interpretashon di kantikanan ku a bira klasiko, manera “Oh  Nenah”, ku ainda awe ta biba den memoria di su públiko. 

Na nòmber di tur músiko i artista afiliá ku AMAK, nos ta ekspresá nos mas  profundo kondolensia na su famia, amigunan, koleganan i tur esnan ku a  konos’é i a stima su arte. 

Su legado lo sigui inspirá músikonan di awe i di mañan. Su bos por a kai na  silensio, pero su músika lo sigui biba pa semper den kurason di nos pueblo. Danki, Boy Wout. Danki pa bo dedikashon, bo humildat, bo talento i e  alegría ku bo a duna nos durante mas di seis dekada. 

Sosegá na pas. Bo legado lo biba pa semper. 

AMAK 

Asosiashon di Musiko i Artista di Kòrsou