Minister Boekhoudt ta habri konsulta nashonal pa desaroyá un Country Cooperation Strategy entre Kòrsou i PAHO/WHO

Willemstad, Kòrsou – 15 di yüli 2026, Minister di GMN Sr. Tyron Boekhoudt, awe a habri ofisialmente e Konsulta Nashonal pa desaroyá e Country Cooperation Strategy (CCS) 2026–2031 entre Kòrsou i e Pan American Health Organization / World Health Organization (PAHO/WHO).

E Konsulta Nashonal ta tuma lugá riba 15 i 16 di yüli 2026 i ta wòrdu organisá pa Ministerio di Salubridat, Ambiente i Naturalesa (GMN) den estrecho kolaborashon ku PAHO/WHO.

Durante e dos dianan, representantenan di varios ministerio, sektor di kuido di salubridat, institushonnan gubernamental, organisashonnan di sosiedat sivil, institushonnan di enseñansa i representantenan di PAHO/WHO ta traha huntu pa definí e prioridatnan ku lo guia e kooperashon tékniko entre Kòrsou i PAHO/WHO den e sinku añanan binidero.

Presente na e apertura tabata tambe Su Ekselensia Gobernador Mauritsz de Kort, Representante di PAHO/WHO pa Trinidad & Tobago i e islanan Hulandes den Karibe, Sr. Gabriel Vivas Francesconi, i Sekretario General di GMN, Sr. Sherlon Melfor.

Den su diskurso di apertura, Minister Boekhoudt a bisa ku e desaroyo di e Country Cooperation Strategy ta representa un paso importante den e proseso di fortalesementu i modernisashon di e sistema di salubridat di Kòrsou. Segun e minister, e CCS lo forma e kuadro stratégiko pa e sosten tékniko ku PAHO/WHO lo brindá na Kòrsou den e añanan binidero, den liña ku e prioridatnan nashonal di nos pais.

Durante e Konsulta Nashonal, e partisipantenan ta evaluá i diskutí e prioridatnan stratégiko proponé pa e periodo 2026–2031, asina tambe e ‘Strategic Deliverables’, òf e resultadonan konkreto ku mester wòrdu realisá mediante e kooperashon entre PAHO/WHO i Kòrsou.

E konsultashonnan ta enfoká riba tres prioridatnan prinsipal:

• operashonalisashon di un modelo integrá, sentrá riba e hende i resistente na efektonan di klima pa kuido primario durante henter e siklo di bida;
• fortalesementu di prevenshon, kontrol i maneho integrá di malesanan transmisibel i no transmisibel;
• desaroyo di un sistema di salubridat mas resiliente, sostenibel i efisiente.

Ademas, e gruponan di trabou lo formulá rekomendashonnan tokante e resultadonan ku PAHO/WHO por yuda Kòrsou realisá den e añanan binidero, tumando e prioridatnan nashonal di Kòrsou i e ekspertisio tékniko di PAHO komo punto di salida.