Petishon pa pone un ora di preguntanan riba e agenda tokante e pago di XCG 8,3 mion pa parti di Curaçao Gaming Authority (CGA)
Na:
Presidente di Staten di Kòrsou
Willemstad, Kòrsou
Asuntu: Petishon pa agendá un ora di pregunta tokante e pago di XCG 8,3 mion pa parti di Curaçao Gaming Authority (CGA)
Señor Presidente,
Mediante e karta aki, mi ta hasi un petishon, di akuerdo ku Reglamento di Òrdu di Staten di Kòrsou, pa agendá un ora di pregunta relashoná ku e informashon ku a sali den medionan di komunikashon tokante un pago di XCG 8,3 mion ku Curaçao Gaming Authority (CGA) a hasi na un persona pa trabounan relashoná ku e sektor di online gambling na Malta.
E informashon aki a krea hopi pregunta i preokupashon den komunidat tokante e legalidat, nesesidat i transparensia di e gastu aki. Mirando e balor konsiderabel di e suma i e gran interes públiko ku e asunto tin, bou di firma ta konsiderá ku ta di sumo importansia pa Staten haña klaridat kompletu tokante e kaso aki.
Nos ta konsiente ku e minister responsabel a anunsiá ku lo manda hasi un investigashon independiente tokante e asunto aki. E petishon aki, sin embargo, no tin komo meta adelantá riba e resultado di e investigashon, sino e ta surgi for di e tarea konstitushonal di kontrol ku Staten tin. Afinal, transparensia no ta kuminsá solamente ora e investigashon terminá, sino tambe ku klaridat tokante ki preguntanan e investigashon mester kontestá i kua hechonan finalmente lo wordu presentá na pueblo. P’esei, bou di firma ta konsiderá importante ku gobièrnu informá Staten tokante e alcance di e investigashon i e puntonan ku lo forma parti di dje.
Den e margen aki, mi ta pidi ku e minister responsabel kontestá, durante e ora di pregunta, e siguiente preguntanan:
1. Minister por konfirmá ku Curaçao Gaming Authority a paga un suma di XCG 8,3 mion na un persona pa trabounan relashoná ku e sektor di online gambling na Malta?
2. Kiko tabata e tarea eksakto i e kontenido di e enkargo ku a wordu duna?
3. Riba kua base legal i kua desishon administrativo a aprobá e pago aki?
4. Ta ken a duna e enkargo i ta ken a outorisá e pago?
5. A sigui un prosedimentu di selekshon òf aanbesteding pa e enkargo aki? Si ta asina, kua prosedimentu a wordu sigui?
6. Pakiko tabata nesesario pa e trabounan aki wordu ehekutá na Malta?
7. Kua trabounan konkreto a wordu realisá i kua resultado nan a entregá?
8. Kon a evaluá si e servisionan prestá tabata den un relashon rasonabel ku e suma ku a wordu pagá?
9. A informá Konseho di Minister i/o Staten promé òf despues di e pago aki? Si ta asina, ki ora i di ki manera?
10. Gobièrnu ta dispuesto pa pone tur kontratonan, fakturanan, rapòrtnan i otro dokumentonan relevante tokante e pago aki na disposishon di Staten?
Ademas, bou di firma ta pidi ku e minister splika kua aspekto nan lo forma parti di e investigashon anunsiá i te kon leu e siguiente preguntanan lo wordu inkluí den e investigashon:
1. E investigashon lo determiná si e pago di XCG 8,3 mion a tuma lugá di forma legal i di akuerdo ku lei i regulashonnan vigente?
2. Lo investigá si e balor di e pago tabata razonabel i proporshonal kompará ku e trabounan ku realmente a wordu hasi?
3. Lo duna klaridat tokante e manera ku e persona en kuestion a wordu selektá i si un prosedimentu transparente i objetivo a wordu sigui?
4. Lo investigá kua funshonarionan òf instansianan tabata involukrá den preparashon, aprobashon i ehekushon di e pago, i kua responsabilidat nan tabatin?
5. Lo determiná kua trabounan konkreto a wordu ehekutá, kua resultado nan a entregá i kon e resultado nan a wordu kontrolá i aseptá?
6. Lo investigá si tabatin kualke forma di konflikto di interes, faboritismo òf otro irregularidat den e proseso di e kontrato?
7. E rapòrt final di e investigashon, inkluyendo e konklushonnan i eventual rekomendashonnan, lo wordu entregá na Staten?
8. Si e investigashon ta mustra ku tin aktonan ilegítimo òf maneho no apropiá, kua medidanan atministrativo, disiplinario òf hurídiko gobièrnu ta intenshoná di tuma?
9. Den kua plaso e minister ta spera ku e investigashon lo finalisá i ku Staten lo wordu informá tokante e resultado nan?
E propósito di e ora di pregunta aki no ta pa adelantá riba e resultado di e investigashon, sino pa permití ku Staten por ehersé su tarea di kontrol di un manera responsabel i pa garantisá e transparensia ku pueblo di Kòrsou tin derecho di spera den un asunto di e grandura aki.
Mirando e gran importansia finansiero i sosial di e asunto aki, mi ta pidi bo amistosamente pa agendá e ora di pregunta aki na e promé reunion di Staten ku ta sigui.
Atentamente,
Ishahier Monte
Parlamentario Frakshon di MFK
Staten di Kòrsou
