Minister van Heydoorn ta fortalesé e futuro di nos herensia kulinario ku “Broertje’s Legacy Program”
Enseñansa, Siensia, Kultura & Deporte
Minister van Heydoorn ta fortalesé e futuro di nos herensia kulinario ku “Broertje’s Legacy Program”
Publiká riba 04 Ougùstùs 2026
Willemstad – Minister di Enseñansa, Siensia, Kultura i Deporte (ESKD), Sithree van Heydoorn, huntu ku miembronan di su kabinete i e tim di Sektor di Kultura i Deporte, a risibí Chèf Charlwin “Broertje” Marshall i presidente di Fundashon Manumit, Kristoffer Kierindongo huntu ku su sekretario René Hooi pa un presentashon tokante e proyekto Broertje’s Legacy Program.
Durante e presentashon a duna un splikashon tokante e vishon di e programa.
E proyekto tin komo meta, preservá i traspasá nos herensia kulinario na un siguiente generashon di chèf. Esaki lo sosodé pa medio di un programa di mentorado den kua chèfnan eksperensiá ta pasa nan konosementu di arte kulinario i abilidatnan di empresario na hóbennan ku ta interesá den e profeshon.
Ademas, e inisiativa ta inkluí desaroyo di un produkto outéntiko di Kòrsou i un serie di dokumental ku lo dokumentá e proseso di transferensia di nos herensia kulinario.
Presidente di Fundashon Manumit, Kristoffer Kierindongo, ta un desaroyadó di konsepto ku eksperensia den e áreanan di herensia kultural, desaroyo di konseptonan kreativo i un empresario kultural. El a desaroyá i realisá diferente proyektonan inovadó kaminda gastronomia, kultura i identidat ta bin huntu, manera e konsepto di restorant Vittle Art. Ku su trabou, e ta kontribuí na hasi e herensia di Kòrsou mas visibel, relevante i bibu den un forma moderno i sostenibel.
Durante e reunion, Minister van Heydoorn a ekspresá su apresio pa e inisiativa i a enfatisá e importansia di sigui fortalesé e legado di Chèf Charlwin “Broertje” Marshall. E trayekto akí ta forma parti integral di e Premio Charlwin (Broertje) Marshall, un premio kultural ofisial di Pais Kòrsou. E premio akí a keda instituí mediante Landsbesluit di 22 di ougùstùs 2019 i ta forma parti di e premionan kultural nashonal di Kòrsou. E premio tin komo meta rekonosé e abilidat di chèfnan lokal tantu hóben komo profeshonal.
Broertje’s Legacy Program ta konektá perfektamente na e vishon di e maneho ku Gobièrnu di Kòrsou ke hiba, pasobra no solamente e ta pasa konosementu i maestria kulinario, sino tambe ta inspirá talento hóben, stimulá empresario kultural i kontribuí na protehá i promové e identidat kulinario rikú di Kòrsou pa e generashon di awe i pa futuro. Di e forma akí nos ta sigui duna balor na kultura di nos pueblo.
