FFK TA LAMENTÁ AKSHON UNILATERAL DI ASOSIASHON DI ÁRBITRONAN!
FFK TA LAMENTÁ AKSHON UNILATERAL DI ASOSIASHON DI ÁRBITRONAN!
Federashon Futbòl Kòrsou ta lamentá profundamente e desishon di Asosiashon di Árbitronan (CFRA) pa retirá su kolaborashon pa e partidonan di futbòl di awe ‘nochi na último momento.
E akshon aki tin konsekuensia direkto i negativo riba e klupnan envolví, hungadónan, staf i sigur pa e fanátikonan.
Dia 10 di ougùstùs 2026 FFK a risibí un karta di CFRA ku, entre otro, un petishon pa un oumento di 100% riba e pagonan aktual. FFK ta tuma e preokupashonnan di e árbitronan na serio i den un reakshon riba 11 di ougùstùs 2026, a proponé un reunion pa awe mes, 12 di ougùstùs pa 4’or di atardi na ofisina di FFK.
CFRA a indiká ku e orario ei no tabata kuminiente i a pidi pa kambia esaki pa 5’or. FFK a proponé mesora pa laga e reunion tuma lugá pa 5:30. CFRA na su turno a rechasá esaki i a akordá pa un renion dia 13 ougùstùs.
FFK ke suprayá ku ta imposibel pa hiba un oumento di salario supstansial di 100% sin un evaluashon kuidadoso di e kapasidat finansiero i e konsekuensianan struktural mas amplio pa e organisashon. Un desishon asin’aki ta eksiguí un proseso sólido i un diálogo konstruktivo.
FFK ta i ta keda kompletamente dispuesto pa diskutí e petishon di CFRA na mesa. Sin embargo, nos ta di opinion ku pa para e servisionan di forma unilateral i na último momento, pa partidonan ku ya tabata planiá no ta un manera apropiá pa hiba diskushonnan kompleho asina. Esaki ta daña e deportividat i e kontinuidat di nos kompetensia.
P’esei FFK ta bolbe pidi e Asosiashon di Árbitronan pa rekurí bèk na mesa di negosashon via e reunion proponé, unda e interes di e deporte di futbòl i e kontinuidat di e kompetensia mester ta na promé lugá.
12 ougùstùs 2026
