Vlam di Libertat a kulminá ku un anochi yen di kanto, baile i konekshon.

Vlam di Libertat a kulminá ku un anochi yen di kanto, baile i konekshon.

WILLEMSTAD – Djasabra 15 di ougùstùs, Landhuis Kenepa tabata e sentro pa Vlam di Libertat, e aktividat final di e seri di evento organisá pa Fundashon Museo Tula i Fundashon Kiminá pa komemorá lucha pa libertat di 1795 bou di guia di Tula. Un anochi yen di músika, alegria i konekshon a trese e seri di e aña aki na su final.

Portanan a habri pa 8or di anochi, kaminda esnan ku a yega trempan tabatin e oportunidat pa sinta i wak dokumentarionan tokante Tula. Despues, Grupo Isoko a yena e ambiente ku nan Müzik di Zumbi, miéntras esnan presente tabata warda riba e bùsnan ku tabata transportá partisipantenan ku a inskribí pa hasi uso di transpòrt pa e evento.

Ku yegada di e bùsnan, Rendel Rosalia a tuma guia di e preparashon pa Dan Waka, un kaminata spesial for di kas di seguridat riba e kaminda di Kenepa pa e sitio sentral di e evento. Bou di lus di un antorcha grandi, kompañá pa ritmo di tambú, chapi, kanto i zonido di kachu, partisipantenan a kana huntu den un ambiente yen di simbolismo i konekshon.

Na yegada, programa a kontinuá ku Bob Harms, kompañá pa Mara Letí, ku a realisá e parti libashon. Despues di e momento aki, Bob Harms a para ketu tambe na e kontribushon di Jeanne Henriquez, presidente di Fundashon Museo Tula, rekonosiendo su trabou i dedikashon kontinuo pa konservá i transmití e historia i legado di Tula. Komo muestra di rekonosementu, Henriquez a risibí un Baston de Eggun. Tambe a sorprendé Jeanne ku un tambú nobo, firmá pa tur trahadó di Fundashon Museo Tula, komo un gesto di apresio pa su kompromiso i trabou.

Un di e momentonan kulminante di e anochi tabata e akto simboliko di traspaso pa hobennan. E hobennan ta Raul Chong, Giandrick Crispulo i Sharidee Wedefoort. E grandinan ku a hasi e traspaso tabata Enecita Alberto (persona di mas edat di Kenepa), Gerda Hosepa i Shurbey Alberto. Nan a kana huntu pa sende e kandela dunando bida na Vlam di Libertat.Tur esnan presente a haña oportunidat pa tira e deseo ku nan a skirbi den e vlam. 

Na e mes momento, Grupo di Tambú Sablika a laga e ritmo di tambú resoná na Kenepa. Ku músika, baile i energia di presentenan, e anochi a sigui den un ambiente di selebrashon i konekshon, pa asina sera Vlam di Libertat 2026. E seremonia a marka e final di un seri di aktividatnan ku a kuminsá ku Ubuntu, sigui ku Uhuru i a kulminá ku Vlam di Libertat. Pa medio di edukashon, kultura, músika, spiritualidat, dialogo i eksperensia, Fundashon Museo Tula a trese komunidat huntu pa sigui reflekshoná riba e historia di Tula, resistensia i e balor di libertat.

Fundashon Museo Tula ta gradisí tur partisipante, artista, fasilitadó, kolaborador, trahadó i boluntario ku a kontribuí na realisashon di Vlam di Libertat 2026.

E aktividat a terminá, pero e Vlam di Libertat ta sigui sendé.