Relashoná ku seguridat, na playanan kaminda ainda no tin drijflijn, tambe ta prohibí pa bai te kantu ku seadoo òf kualke otro embarkashon

Relashoná ku seguridat, na playanan kaminda ainda no tin drijflijn, tambe ta prohibí pa bai te kantu ku seadoo òf kualke otro embarkashon

Willemstad – Ministerio di Salbridat, Medio Ambiente i Naturalesa (GMN), a instalá “drijflijn” na diferente playa, ku ta sirbi pa separá e área destiná pa landamentu for di e área kaminda tin trafikashon marítimo.

Sin embargo, GMN ta sigui risibí keho ku boto i seadoo ta pasa riba e drijflijn pa drenta den e área destiná pa landa i okashoná molèster. GMN ta enfatisá ku ta prohibí pa boto òf seadoo pasa riba e drijflijn pa drenta den e área asigná pa landamentu. Tambe ta prohibí pa mara seadoo òf otro embarkashon na e drijflijn.

Kontròl i konsekuensia
Pa garantisá ku ta kumpli ku e reglamentu aki, lo tin mas kontròl riba e uzo di e área di landamentu i riba e drijflijnen. Personanan ku deliberadamente pasa ku boto òf seadoo riba e drijflijn pa drenta den e área di landamentu, òf ku mara nan embarkashon na e drijflijn, por enfrentá konsekuensianan konforme e legislashon marítimo vigente, inkluyendo e Vaartuigenverordening i otro reglamentu aplikabel.

Un boto òf seadoo por pasa riba e drijflijn pa bai kantu solamente den kaso di emergensia. GMN ta pidi tur usuario di boto i seadoo pa respetá e límite ku e drijflijn ta indiká. Esaki no ta solamente un asuntu di kumplimentu ku regla, sino prinsipalmente un medida pa protehá bida i seguridat di tur hende ku ta hasi uso di nos laman.

Na playanan kaminda ainda no tin “drijflijn”, tambe ta prohibí pa bai te kantu ku seadoo òf kualkier tipo di embarkashon

Willemstad – Ministerio di Salubridat, Medio Ambiente i Naturalesa (GMN) ta informá ku na playanan kaminda ainda no a instalá “drijflijn”, tambe ta prohibí pa bai te kantu ku seadoo òf kualke tipo di embarkashon. Resientemente por a mira ku na Playa Kenepa Chikí, kual ta un playa ku ainda no tin “drijflijn”, personanan ku seadoo tabata okashoná basta molèster na kantu kaminda muchanan ta landa.

E medida aki ta importante pa garantisá seguridat di esnan ku ta landa i rekreá den laman i prevení situashonnan peligroso entre embarkashonnan i personanan ku ta disfrutando di laman. Ta pidi tur operadó di seadoo i embarkashon pa respetá e zona di landamentu i no drenta bai te na kantu, asta ora e “drijflijn” ta instalá i e zona asigná ta klaramente indiká.

GMN ta enfatisá ku e prohibishon ta konta tambe pa esnan ku ta uza seadoo òf embarkashon pa bai te kantu pa kualke motibu. E hecho ku ainda no tin “drijflijn” na un playa, no ta nifiká ku ta pèrmití pa drenta e zona di landamentu. Ta pidi tur usuario di laman pa kolaborá i sigui e indikashonnan di seguridat. Esnan ku no ta kumpli ku regla por wòrdu someté na kontròl i eventual konsekuensianan segun e legislashon vigente.

GMN ta gradisí p’e kolaborashon di tur hende pa hasi nos playanan un sitio mas sigur pa tur hende.