Ministerio di Salú, Medioambiente i Naturalesa (GMN) ta Atvertí pa Periodo Mas Kalor di Aña

Ministerio di Salú, Medioambiente i Naturalesa (GMN) ta Atvertí pa Periodo Mas Kalor di Aña

Ministerio di Salú, Medioambiente i Naturalesa (GMN) ta konsehá habitantenan i bishitantenan di Kòrsou pa pone èkstra atenshon na nan salú durante periodo di kalor aktual.

Aunke henter aña ta kalor na Kòrsou, speshalmente den lunanan ougùstùs te ku òktober por ekspersensia temperaturanan mas haltu. Debí na kambio di klima, mundialmente tin mas periodo kalor i nan por dura mas largu. Na Kòrsou tambe nos ta konosí ku temporada di kalor; speshalmente den lunanan ya menshoná. Esaki ta eksigí èkstra atenshon pa e posibel konsekuensianan di kalor pa salú i ta rekerí medidanan simpel pa evitá òf limitá problema ku salú dor di kalor. 

Durante periodonan di kalor ta importante tambe pa keda alerta, speshalmente pa personanan vulnerabel rònt di bo; por ehèmpel: beibinan i muchanan yòn (0-4 aña), personanan di edat avansá, personanan ku malesa króniko i ku ta usa remedí, personanan ku sobre peso, èts. Ku medidanan simpel por evitá òf limitá problemanan di salú pa motibu di kalor, manera: kansansio, doló di kabes, biramentu di kabes, walmentu di stoma, kai flou òf bai leu.

Ministerio di Salú, Medioambiente i Naturalesa (GMN) ta duna e siguiente konsehonan pa protehá bo mes i otro kontra kalor:

• Protehá bo kurpa kontra (kontakto direkto ku ) solo; speshalmente entre 11:00 i 15:00, ku ta e momentunan mas kalor durante dia. Tene bo kurpa fresku dor di keda mas tantu posibel den un lugá fresku i buska manera pa refreská bo kurpa.

 

• Si bo ta traha òf ta hasi ehersisio pafó, evitá di move den solo kayente. Plania esfuerso físiko mas tantu posibel na e momentunan mas fresku di dia.

 

• Bebe sufisiente awa i hasi esaki frekuentemente. No warda te ora bo tin set.

 

• Tira bon bista riba beibi i mucha chikitu (0 – 4 aña). Nan por haña problema mas lihé pa motibu di kalor; i ta ménos ábil pa indiká ku nan ta sinti nan kurpa malu.

 

• Pone èkstra tinu na hende grandi i hendenan ku malesa króniko. Kontrolá regularmente kon ta bai ku nan, speshalmente ora nan ta biba nan so i/òf ta hasi uso di remedi.

Bo no ta sinti bo bon pa motibu di kalor? Buska un lugá fresku i bebe awa. Den kaso ku e medidanan akí no yuda òf e síntomanan ta keda, tuma kontakto ku bo dòkter di kas.

Ministerio di Salubridat Medioambiente i Naturalesa ta sigui traha na prevenshon i konsientisashon tokante salú relashoná ku kalor p’asina mas tantu posibel evitá òf limitá problemanan di salú durante periodonan di kalor. Nos ta informá habitantenan i bishitante di Kòrsou tokante e riesgonan di e periodonan di kalor i ta trahando pa komunidat ta mihó prepará kontra kalor.

Pa mas informashon por sigui kanalnan di media sosial di Ministerio di Salú, Medioambiente i Naturalesa (GMN), esta:

Facebook: Ministry of Health Environment and Nature Curacao

Instagram: Ministeriegmn

TikTok: Ministeriegmn

YouTube: Ministeriegmntv