Minister Boekhoudt: baha lista di espera pa kuido spesialisá ta un prioridat

WILLEMSTAD – Minister di GMN, Tyron Boekhoudt, a reuní ku Grupo Keralty pa sigui traha riba solushonnan pa e lista di espera largu pa kuido spesialisá na Kòrsou. Esaki ta di dos biaha ku representantenan di Keralty ta bishitá Kòrsou despues di e bishita di Minister Boekhoudt na Colombia na yüni di e aña aki.

“Tras di kada nòmber riba e lista di espera tin un hende ku ta spera pa haña kuido. Pa e hende ei, kada dia ta konta. P’esei baha e lista di espera ta un di mi prioridatnan. Nos mester pasa di kombersashon pa solushon” Minister Boekhoudt a deklará.

E reunion ku Keralty ta parti di e trabou pa identifiká kon kuido spesialisá por bira mas aksesibel i kon kapasidat di tratamentu por oumentá. E Minister ta enfoká riba opshonnan práktiko, manera trese spesialistanan pa atendé pashèntnan na Kòrsou, fortalesé kapasidat lokal i organisá kuido na eksterior ora esaki ta e mihó solushon pa e pashènt. Kada opshon mester wordu evaluá huntu ku e instansianan di kuido i siguransa sosial, ku kalidat i nesesidat médiko di pashènt na promé lugá.

“Nos pueblo no por keda warda mas. Mi ta sigui buska partnernan ku por yuda nos krea kapasidat, baha tempu di espera i duna hende akseso na kuido ku nan tin mester”, e Minister a bisa.

Minister Boekhoudt ta enfatisa ku e kontakto ku Keralty mester kontribuí na un solushon duradero pa Kòrsou. E siguiente paso ta konkretisá kua opshonnan ta realistiko, kon nan por wordu organisá i kiko nan por nifiká pa pashèntnan ku ta wardando ainda. E Minister lo sigui informá komunidat ora tin resultadonan konkreto pa anunsiá.