E konteo pe gran fin di siman ‘di Romeo’ por kuminsá! Moves Entertainment ta kompletá line-up pa 6 di novèmber ku Aria Vega i Kòrsou su propio Ephrem J.

E konteo pe gran fin di siman ‘di Romeo’ por kuminsá! 

Moves Entertainment ta kompletá line-up pa 6 di novèmber ku Aria Vega i Kòrsou su propio Ephrem J.

WILLEMSTAD: Tabata ayera djaweps atardi ku ofisialmente a selebrá apertura di ‘House Of Moves’. E espasio na Churchill Plaza lo sirbi komo ofisina di e organisashon i tambe un ‘sentro di kliente’. “House Of Moves” lo ta un punto di enkuentro pa tur kliente ku a kumpra nan mesa, fanátikonan ku ke nan karchi pa “Mejor Tarde Que Nunca” i muchu mas. E selebrashon di e gran apertura a bai kompañá ku e último anunsio i detayenan dje Pre-Party i e gran konsierto. Un fin di siman espektakular ta na kaminda!

Emoshon rònt di Aura Festival 2026 ta sigui oumentá awor ku Moves Entertainment ta anunsiá e artistanan pa kompletá e aliniashon di djabièrnè, 6 di novèmber. Despues di anunsiá e legendario Ivy Queen i e strea di bachata dominikano Luis Miguel Del Amargue, Aura Festival awor ta yama bon bini na sensashon urbano/reaggeaton di momentu, Aria Vega i Kòrsou su propio Ephrem J pa kompletá e promé anochi (Pre-Party) di e festival. Ku e anunsio final aki, e aliniashon pa dia 6 di novèmber ta trese streanan internashonal i talento lokal huntu pa un selebrashon di músika i entretenimentu Latino.

Djabièrnè, 6 di novèmber lo konta ku Ivy Queen, Luis Miguel Del Amargue, Aria Vega, i Ephrem J., kreando un promé anochi diverso ku ta move for di e zonido ikóniko di reggaetón di Ivy Queen pa e ritmonan inkonfundibel di bachata dominikano i e energia di Aria Vega i Kòrsou su propio Ephrem J. Djasabra, 7 di novèmber ta sigui ku Alex Sensation i e superstreanan internashonal di bachata Romeo Santos i Prince Royce, presentando “Mejor Tarde Que Nunca.” Dos anochi, dos eksperensia musikal distinto, i un wikènt diseñá pa trese fanátikonan un eksperensia inolvidabel.

Moves Entertainment ta duna fanátikonan mas balor pa nan karchi; kòrda ku un karchi ta duna ​​akseso na tur dos anochi di e festival. Esei ta nifiká dos anochi di entretenimentu di klase mundial; un wikènt ekstraordinario! Fanátikonan por kumpra nan karchi na Ticketpoint Zeelandia, 24 Uur Uit De Muur, House of Moves na Churchill Plaza, ESO, òf online via http://www.moves-entertainment.com. Sigui Moves Entertainment p’e último detayenan i informashon dje festival.