Di Kòrsou pa Mundu
Enseñansa, Siensia, Kultura & Deporte
Di Kòrsou pa Mundu
Publiká riba 25 Sèptèmber 2026
Siman di Kultura 2026 ta selebrá su di 22 edishon bou di e tema “Di Kòrsou pa Mundu”
WILLEMSTAD – Ministerio di Enseñansa, Siensia, Kultura i Deporte (ESKD) ta informá pueblo di Kòrsou ku Siman di Kultura 2026 ta di 27 di sèptèmber te ku 4 di òktober. E di 22 edishon akí tin komo tema “Di Kòrsou pa Mundu”. Durante e siman, nos ta pone nos lus riba nos kultura nos talentonan ku a sa di destaká den mundu. Siman di Kultura 2026 ta keda dediká na sr. Urny Florán i sra. Izaline Calister komo apresio pa nan talentonan di Kòrsou ku ta bria den mundu.
Djadumingu 27 di sèptèmber, e siman ta kuminsá ku un misa kultural na Basílika di Santa Ana for di 8’or di mainta. Despues, e programa ofisial ta sigui na Molenplein di 9:30 te 10:30 di mainta.
Pa e selebrashon di atardi i anochi, ministerio ta traha huntu ku Kaya-Kaya pa yena Otrobanda ku kultura. Di 4’or di atardi te 11’or di anochi, públiko por kana entre Molenplein, St. Martinus, Brionplein i otro sitionan den Otrobanda pa disfrutá di músika, baile, arte, tambú, kuenta, kuminda i produkto lokal. Na Brionplein, SKOBA ta presentá ya pa di sinku (5) aña e famoso Festival di Bailenan Folklóriko 2026.
Molenplein – Siman di Kultura
Na Molenplein, públiko por disfrutá di un programa kultural yen di músika, entretenementu, produkto lokal di artesánonan i di gastronomia. E área lo forma un di e puntonan sentral di selebrashon durante apertura di Siman di Kultura. Riba esenario tin presentashon di entre otro Grupo Den Dam, Oriri i Axl & Orchestra, ku ta trese diferente artista lokal huntu den un programa musikal variá. Nos invitado spesial, Izaline Calister, tambe ta presente.
St. Martinus – Kultura, Arte i Eksperensia
Na St. Martinus, kultura, arte i kreatividat ta bini huntu den un ambiente interaktivo pa henter famia. E área akí ta konta ku músika, arte, tayer, charla, kontamentu di kuenta, poesia i diferente eksperensia kultural. Durante e atardi, tin diferente tayer i charla kaminda partisipantenan por siña, krea i eksperensiá nos kultura di serka. E tayernan ta grátis, pero kada un tin espasio limitá i registrashon adelantá ta nesesario. Personanan interesá por registrá via e siguiente link: https://forms.gle/LeDGziVmY3Vt57Ze6
Un parti spesial di e programa ta un podcast interaktivo, ku kombersashon i entrevista ku, entre otro, Ruthsel Soliana i Percy Pinedo. E públiko tin e oportunidat di skucha nan historia, eksperensia i perspektiva den un ambiente interaktivo. Isoko tambe ta forma parti di e anochi spesial akí. Palabra, poesia i ekspreshon artístiko tambe ta parti di e programa, ku presentashon di Eduard Reineta, Tittel Del Mar, Kati Qui, Tyson Hill i Crisanta Martha. Arte visual tambe tin su lugá. Den un Kas di Arte, bishitantenan por deskubrí i disfrutá di obra di arte produsí aki na Kòrsou, poniendo talento i kreatividat lokal sentral.
St. Martinusstraat – Djadumingu na Otrobanda
Na St. Martinusstraat, nos ta selebrá Dia Mundial di Turismo ku un ambiente relahá, musikal i familiar bou di e konsepto Djadumingu na Otrobanda. Kombo Krioyo, un banda manehá pa Hershel Rosario, ta forma e base musikal di e programa i ta kompañá diferente kantante, entre nan Yumarya Grijt i Ike Jesurun. Ademas di músika, bishitantenan por disfrutá di diferente artesania, kuminda, bebida i otro produktonan lokal. Pa e muchanan tin un área pa mucha ku aktividat spesial pa nan, pa asina henter famia por disfrutá di e ambiente di apertura di Siman di Kultura.
E konsepto inisiá pa CTB “Djadumingu na Otrobanda” no ta solamente un aktividat pa habri Siman di Kultura 2026. E intenshon ta pa e konsepto regresá tur último djadumingu di luna, kreando un momento fiho riba kua komunidat i bishitante por bini huntu pa disfrutá di Otrobanda.
Brionplein – Festival di Bailenan Folklóriko 2026 di SKOBA
Na Brionplein, baile ta bai ta sentral ku e Festival di Bailenan Folklóriko 2026 organisá pa SKOBA. Dies (10) grupo di baile ta subi esenario pa presentá nan talento, koreografia i diferente forma di ekspreshon. E festival ta brinda un plataforma pa selebrá diferente estilo di baile i ekspreshon kultural i ta agregá un otro dimenshon na e gran selebrashon den Otrobanda.
Asina, for di Molenplein pa St. Martinus, St. Martinusstraat te Brionplein, bishitantenan por kana di un área pa otro i eksperensiá diferente parti di nos kultura: músika, arte, poesia, baile, gastronomia, produkto lokal, tayer i aktividat pa henter famia.