Sivismo na Kòrsou ta sigui haña forma: grupo di trabou ta sigui traha ku mesun dedikashon

Kasi un aña despues di un biahe di estudio na Hulanda, un grupo amplio di profeshonal di enseñansa ta sigui traha konstantemente riba e tema di sivismo den enseñansa na Kòrsou.

Kiko ta hasi un hende un bon siudadano? I kon nos por prepará hóbennan pa nan lugá den sosiedat? E preguntanan akí ta sentral den e trabou di un grupo di diesseis (16) profeshonal di enseñansa ku, for di novèmber 2025, ta okupá ku desaroyo di enseñansa di sivismo na Kòrsou. E grupo ta konsistí di diferente miembro di personal di enseñansa di e shete direktivanan di skol na Kòrsou i tambe di University of Curaçao (UoC).

*Di eksplorashon pa implementashon*

Na novèmber 2025, e grupo a biaha pa Hulanda pa mira kon enseñansa di sivismo ta organisá aya. E meta no tabata pa kopia e modelo hulandes, sino pa gana eksperensia i adapt’é na e konteksto kurasoleño. Despues di nan regreso, a dividí e grupo den tres grupo di trabou, e asina yamá SIG (Special Interest

Group), kada unu ku su propio tarea:

• Meta final: Kiko e alumno mester sa i por hasi riba e tema di sivismo?

• Material didáktiko: Kua material maestronan tin mester pa duna forma na sivismo den klas?

• Profeshonalisashon: Kon por ekipá maestronan ku konosementu i konfiansa pa duna enseñansa di sivismo?

For di novèmber, e gruponan di trabou a sigui traha di manera kontinuo. Konstantemente ta traha riba e metanan final, materialnan didáktiko i profeshonalisashon. E siman akí e grupo kompleto lo reuní atrobe pa pone huntu e resultadonan alkansá i pa determiná e siguiente pasonan.