SOAW i Aqualectra ta introdusí ‘Keda Konekta’

Un enfoke pa sosten duradero den maneho di gastunan i presupuesto

Willemstad, 26 di òktober 2026 – Ministerio di Desaroyo Sosial, Labor i Bienestar (SOAW), bou di responsabilidat di Minister Charetti America-Francisca i den kolaborashon ku Aqualectra ta introdusí KEDA KONEKTÁ, un programa pa duna alivio na kasnan di famia ku pa kualke motibu a haña nan mes den un situashon sosial ekonómiko difísil. Adishonal, e programa ta duna sosten na e famia pa siña manehá su gastunan i presupuesto na e manera apropiá i balansá. KEDA KONEKTÁ alabes ta rekonektá awa i koriente pa hogarnan ku tin un periodo deskonektá òf tin un debe haltu di awa òf koriente.
E programa KEDA KONEKTÁ ta tuma un paso importante den direkshon di solushonnan mas struktural i duradero pa nos komunidat. E meta no ta solamente pa duna hogarnan un sosten finansiero for di e ministerio SOAW, pero tambe pa atendé ku e situashon aktual di e hogarnan akí i generalmente prevení debenan problemátiko i stimulá uso konsiente di awa i koriente.

Di yudansa finansiero pa sosten duradero
Pa hopi aña kaba, Ministerio SOAW ta sostené hogarnan ku tin un entrada abou pa nan por logra kubri nan faktura di awa i koriente. Esaki, pa medio finansiero, mediashon, intervenshon, guia i supsidio pa awa i koriente. Lamentablemente den práktika ta resultá ku apesar di e sosten aki, tin hogarnan ku tòg ta kai atras den pago di nan resibunan. Esaki por tin komo konsekuensia ku e hogar ta kore rísiko pa deskonekshon òf ta keda deskonektá di awa i/ òf koriente.

KEDA KONEKTÁ ta trese un solushon duradero
Na fin di aña 2024 i inisio di 2025, e mesun konsepto akí ya a keda ehekutá den forma di un proyekto piloto ku tabata karga e nòmber ‘Pasku di Bida’. Komo un proyekto piloto, ‘Pasku di Bida’ tabata mará na un kuminsamentu i un fecha final.
Keda Konektá, sinembargo, lo ta un programa struktural ku lo sigui yuda mas tantu famia posibel pa risibí e hèrmèntnan nesesario pa un maneho propio i duradero di nan presupuesto i finansas.

Hogarnan ku ta bini na remarke ta risibí nan rekonekshon di awa i koriente i den kaso ku tin un debe di awa i koriente habrí ta atendé ku esaki. Klientenan ku, por ehèmpel, ta kobra ònderstant òf ta gana entrada mínimo, por yega na sanea e debe habrí kompletamente.
Huntu ku esaki, klientenan ku ta bini na remarke ta risibí un supsidio konforme lei di parti di SOAW pa por sigui kubri nan gastunan mensual di awa i koriente. Tambe nan lo risibí guia pa atendé ku nan finansa i responsabilidatnan di nan hogar mas mihó.

Komo parti di e programa, tur kliente ta keda (re)konektá pa medio di un meter Prepago Inteligente di Aqualectra pa awa i koriente. Ku e meter Prepago Inteligente, e kliente  tin un bista na tur momentu riba su konsumo i e mes por planea kua ta e montante ku e lo ke rekargá i na ki momentu. Komo ku e meter ta prepago, e kliente no mester warda te fin di luna pa risibí su resibu i mira kiko tabata su konsumo di e luna anterior. Pues, ku Prepago Inteligente e kliente tin mas kòntròl, maneho di su uso i konsumo den su plant’i man i ta prevení ku por krea debe di awa i koriente den futuro.

KEDA KONEKTÁ ta nifiká un momentu di kambio pa e hogarnan ku ta partisipá. Pa hopi famia, KEDA KONEKTÁ lo ta e traspaso di un situashon difísil pa un situashon di stabilidat. Pa e stabilidat por ta duradero, ta dependé di e hogar mes: usa awa i elektrisidat na un manera konsiente, vigilá konsumo i tuma e responsabilidat pa karga su Prepago Inteligente na tempu.

Guia i responsabilidat própio
E hogarnan ku ta partisipá ta pasa den un trayekto di guia di tres aña, kaminda ta duna atenshon na uso konsiente, independensia finansiero i kumplimentu ku e areglonan di pago.

Minister di SOAW, sra. Charetti America-Francisca, ta enfatisá riba importansia di e enfoke nobo aki:
“Awa i elektrisidat ta nesesidatnan básiko. Ku KEDA KONEKTÁ nos ke bai mas leu ku djis yuda ku e pago di un faktura. Nos ke yuda famianan sali for di un situashon di problemanan di pago kontinuo i prevení ku nan ta drenta den e mesun situashon atrobe. Pa e motibu ei nos ta kombiná sosten finansiero ku guia i responsabilidat própio. Nos ta duna un man di yudansa, pero nos ta traha huntu ku e famia i Aqualectra riba un solushon duradero.”

Inskripshon pa KEDA KONEKTÁ
Hogarnan ku ke apliká pa KEDA KONEKTÁ, por apliká via www.kedakonekta.cw.
SOAW i Aqualectra ta evaluá kada petishon a base di e kondishonnan vigente i ta informá e kliente tokante e siguiente pasonan.

Pa mas informashon òf yudansa ku e inskripshon, kliente por dirigí nan mes na Kas di Bario/ofisinanan di bario di SOAW.
KEDA KONEKTÁ ta un man di yudansa, pero tambe un responsabilidat komun.