Djaweps, 29 di òktober 2026, a tuma lugá dos Ora di Pregunta den sala di reunion di Parlamento di Kòrsou, kaminda representantenan di Gobièrnu a presentá pa kontestá preguntanan di Miembronan di Parlamento i duna informashon tokante e tópikonan riba agènda.

E promé Ora di Pregunta tabata tokante “Kompra di edifisio SEHOS”, riba petishon di Miembro di Parlamento, sra. Giselle Mc William. Minister di Tráfiko, Transporte i Planifikashon Urbano, sr. Charles Cooper, a presentá pa kontestá e preguntanan relashoná ku e tópiko.

Durante e di dos Ora di Pregunta, a trata dos tópiko. E promé tabata “Oumento drástiko di tarifa di awa, koriente, gasolin i diesel”, riba petishon di sr. Seferina. Minister Cooper, den e kaso aki remplasando e Minister di Asuntunan General, a presentá pa kontestá e preguntanan relashoná ku e tópiko. Minister Cooper a logra duna kontesta riba tur pregunta ku a ser hasi, sinembargo debí na e faktor di tempu, ningun otro miembro i tampoko sr. Seferina komo petishonario a logra hasi preguntanan adishonal.

Seguidamente, a trata e di dos tópiko: “Posishon hurídiko di Stichting HNO Holding i/òf HNO Vastgoed en Beheer N.V. i/òf HNO Transitie en Exploitatie Maatschappij N.V. (CMC) den relashon ku e forma di kolaborashon ku Colsanitas”. Minister Tyron Boekhoudt a duna kontesta na e preguntanan ku Miembro di Parlamento, sra. Suzanne Camelia-Römer, a hasi riba 7 di òktober último.

Mirando ku pa e di dos tópiko aki a sobra algun minüt, Vise presidente di Parlamento, sr. Ramón Yung, a duna Miembronan di Parlamento oportunidat pa hasi preguntanan adishonal relashoná ku e tópiko. Minister Boekhoudt a kontestá e preguntanan adishonal pa finalmente, Visepresidente di Parlamento, sr. Ramón Yung, a sera e enkuentro.