Minister Hato ta firma deklarashon di intenshon pa koperashon entre JJIC i Scouting Antiano

WILLEMSTAD – Minister di Hustisia, Shalten Hato, a firma djamars 3 di november, huntu ku señor Daniel Corsen di Scouting Antiano, un deklarashon di intenshon.

Ku e koperashon aki, Ministerio di Hustisia ke brinda hóbennan den JJIC mas oportunidat pa desaroyá nan mes tantu personal komo sosialmente. Minister Hato a enfatisá e importansia di organisashonnan manera Scouting Antiano den e proseso aki. Scouting por yuda hóbennan siña balornan manera rèspèt, disipliná, responsabilidat i koperashon.

E inisiativa pa e koperashon aki a bini di Gobernador di Kòrsou, Su Ekselensia Maurits de Kort, kende tambe tabata presente durante e firmamentu. E idea ku a kuminsá serka dje a bira un paso konkreto. Diferente minister di Gabinete Pisas III tambe tabata presente.

Señor Corsen a ekspresá su entusiasmo pa e koperashon. El a bisa ku un kolaborashon di e tipo aki ta algu ku Scouting Antiano a deseá pa hopi aña kaba. Su soño ta pa un dia mira hóbennan di JJIC kana den uniform di scouting durante aktividatnan ofisial, sin ningun diferensia visibel.

Pa direktora interino di JJIC, señora Natascha Pieter, e tabata un momento spesial pa mira kon e idea a bira realidat.

Ku e koperashon aki, Ministerio di Hustisia ta sigui traha pa duna hóbennan den JJIC oportunidat i yuda prepará pa un futuro positivo.