Joran van der Sloot trasladá pa prizon Cochamarca
Joran van der Sloot trasladá pa prizon Cochamarca
Joran van der Sloot (36) a wordu trasladá for di e famóso prizon Challapalca pa e institushon penitensiario Cochamarca na Perú. Van der Sloot mes a informa esaki pa medio di telefòn na su famia i na e diario De Telegraaf.
Van der Sloot a yama ku un telefòn for di un bus ku tabata hib’é pa su nobo prizon. Segun dje, e detení na Challapalca ta wordu trasladá aktualmente pasobra e prizon lo haña un renovashon kompleto. No ta kla kuantu tempu e trabou lo tuma ni kuantu prizonero eksaktamente lo wordu trasladá.
Cochamarca ta situá den e region di Pasco, den e Andesnan di Perú. E institushon ta keda na un haltura di mas o ménos kuater mil meter i ta keda na un distansia di aproksimadamente kuater ora di biahe for di Lima. Segun Van der Sloot, e prizon tin e mesun nivel di seguridat ku Challapalca, pero e edifisio ta mas moderno segun e normanan di Perú.
E traslado ta parse ku tambe tin un bentaha práktiko pa Van der Sloot. Challapalca ta keda hopi leu for di Lima, den un área aislá i difísil pa yega na dje. For di Cochamarca, kontakto ku mundu pafó por bira mas fásil. Van der Sloot a bisa su esposa ku e ta kontentu ku e mudansa.
E hulandes aki a pasa hopi aña sera na Challapalca, un di e prisonan mas aislá di Perú. Ey e tabatin di enfrenta kondishonnan duru i anteriormente e lo a keha tokante menasá di otro prizoneron. No ta konosí si e kehonan ei tin relashon ku e traslado aktual.
Van der Sloot ta kumpli na Perú un kastigu di 35 aña di prizon pa motibu di e asesinato di e studiante Stephany Flores na 2010.
Ademas, na Merka e a wordu kondená pa extorshon di e famia di e adolesente merikano Natalie Holloway, kende a disparsé na Aruba na 2005. Van der Sloot a rekonosé den e kaso ei ku e a mata Natalie.
Resientemente, su nòmber a bolbe haña hopi atenshon dor di un série di Netflix tokante e kaso di Holloway. E série a trese e desparishon di Natalie i e buskeda di hopi aña pa haña klaridat riba e kaso atrobe den atenshon públiko.
Mas informashon tokante su kastigu di prizon na Perú por mira den e video aki abou.
