Un vishon di mobilidat ku ta enfoķá riba futuro pa 2040

Willemstad  – Ministerio di Tráfiko, Transporte i Planifikashon Urbano (VVRP) huntu ku e kompania Movares for di Hulanda ta trahando pa desaroyá un vishon di mobilidat pa Kòrsou. Den kuadro di e kolaborashon aki, un delegashon di Movares ta di bishita na Kòrsou di 9 te ku 13 di novèmber 2026.

Djaluna 9 di novèmber, e bishita di trabou a kuminsá ofisialmente ku un seshon di apertura. Durante e siman, lo tin diferente seshon di konsulta ku organisashonnan i representantenan di diferente sektor ku ta envolví den desaroyo di mobilidat, tráfiko, transporte i infrastruktura na Kòrsou.

Ku desaroyo di un vishon di mobilidat, VVRP ke traha na un rumbo klá i duradero pa futuro di mobilidat na Kòrsou. Temanan manera aksesibilidat, seguridat den tráfiko, fluho di tráfiko, transporte públiko i mobilidat sostenibel por hunga un papel importante den esaki.

E vishon di mobilidat tin komo meta di kontribuí na un mihó komprenshon di e retonan aktual den mobilidat i identifiká oportunidatnan pa mehorashon den futuro.

Durante e bishita di trabou, Movares lo tene kombersashonnan ku diferente organisashon i partidónan interesá. E meta di e kombersashonnan aki ta pa kolektá informashon relevante, eksperensianan i puntonan di bista ku por sirbi komo aporte pa desaroyo di e vishon di mobilidat.

VVRP ta konsiderá partisipashon di diferente sektor i organisashon di suma importansia, mirando ku mobilidat ta un tema ku tin influensia direkto riba bida diario di habitantenan, empresanan i bishitantenan di Kòrsou.

Despues di finalisashon di e bishita di trabou, lo resumí e konklushonnan i resultadonan prinsipal di e kombersashonnan. Lo hasi uso di e informashon aki pa sigui elaborá e vishon di mobilidat pa Kòrsou.

VVRP lo sigui mantené komunidat informá tokante progreso di e trayekto aki i próksimo pasonan den kolaborashon ku Movares.