Minister Roderick Middelhof ku paso firme na Den Haag: Entrega di business case na Minister Tom Berendsen pa kita obligashon di visa pa suidadanonan di Repúblika Dominikana

DEN HAAG – Den un mundu kaminda ekonomianan ta bira kada bes mas konektá ku otro, i paisnan ta kompetí pa atraé invershon, habri merkado nobo i fortalesé nan posishon ekonómiko, Kòrsou tambe mester sigui evaluá unda e oportunidatnan di futuro ta situá. Ta den e konteksto aki ku Minister di Desaroyo Ekonómiko, Dr. Roderick Middelhof, durante un enkuentro na Den Haag ku Minister di Asuntunan Eksterior di Hulanda, sr. Tom Berendsen, a hasi entrega di un business case ku ta analisá e posibilidat i e benefisionan potensial di eliminá e obligashon di visa pa siudadanonan di Repúblika Dominikana ku kier bishitá Kòrsou.

E entrega aki ta forma parti di un proseso di evaluashon i konsultashon den kuadro di e mandato ku Minister Middelhof a risibí di Promé Minister Gilmar Pisas, kende ta e Minister responsabel pa asuntunan di eksterior. E punto di salida ta e pregunta di kon Kòrsou por fortalesé su konekshonnan ku ekonomianan dinámiko den region, probechá oportunidatnan nobo pa tantu Gobiernu komo sektor privá i krea mas posibilidatnan pa kresementu ekonómiko sostenibel.

Repúblika Dominikana ta un di e ekonomianan mas grandi i dinámiko di Karibe, ku un produkto bruto doméstiko di aproximadamente US$ 127,4 mil mion. Durante e último 20 añanan, e ekonomia dominikano a krese konsiderablemente, ku un diversifikashon di aktividatnan den agrikultura, produkshon industrial, konstrukshon, komèrsio, transporte, turismo i servisionan finansiero. E kresementu aki a bai kompañá ku un ekspanshon di su merkado interno, su kapasidat di eksportashon i su konekshonnan komersial ku otro paisnan.

Pa un ekonomia relativamente chikí manera esun di Kòrsou, ku ta dependé pa gran mayoria di importashon, un merkado di e tamaño aki por representá oportunidatnan ku ta bai mas leu ku solamente turismo. E posibilidat pa empresarionan kurasoleño identifiká provedonan nobo, eksplorá merkadonan pa eksportashon, establesé relashonnan komersial i atraé invershonistanan regional por kontribuí na un ekonomia mas diversifiká i ménos dependiente di un kantidat limitá di sektor òf merkado.

Den e sentido aki, un relashon ekonómiko mas estrecho ku Repúblika Dominikana por habri perspektivanan interesante pa diferente sektor di nos ekonomia. Por ehèmpel, empresanan lokal por eksplorá posibilidatnan pa importá produkto na kondishonnan mas kompetitivo, miéntras ku produktornan i dunadó nan di servisio na Kòrsou por buska oportunidatnan pa ekspandé nan aktividatnan den un merkado regional mas grandi. Na mes momentu, Kòrsou por presentá su mes komo un lokalidat atraktivo pa invershonnan den logístika, turismo, teknologia, servisio empresarial i otro aktividatnan ku por generá empleo i stimulá e ekonomia lokal.

Un otro aspekto ku meresé atenshon ta e posibilidat pa fortalesé konekshonnan di transporte i komèrsio entre ámbos pais. Mas konektividat regional por kontribuí na un moveshon mas efisiente di produkto, servisio i aktividatnan empresarial, loke por benefisiá no solamente kompanianan grandi, sino tambe empresarionan chikí i mediano ku ta buska manera nobo pa krese. Den un region ku ta sigui desaroyá, e kapasidat di Kòrsou pa posishoná su mes komo un punto di konekshon entre diferente merkado por bira un bentaha kompetitivo importante.

E diskushon tokante e obligashon di visa pa siudadanonan dominikano no ta un tema nobo. Ya na desèmber 2022, riba inisiativa di Minister di Hustisia Shalten Hato, Konseho di Minister a aprobá realisashon di un estudio tokante e posibilidat pa eliminá e obligashon aki. Entre e konsiderashonnan tabata e oportunidat pa stimulá turismo entre ámbos pais, pero tambe pa fasilitá kontakto familiar, teniendo kuenta ku Kòrsou tin un komunidat dominikano grandi ku ta forma parti di nos sosiedat.

Kòrsou ya tin eksperensia ku kambio den polítika di visa. Na aña 2014, Konseho di Minister a disidí pa eliminá e obligashon di visa pa siudadanonan Colombiano. Den añanan ku a sigui, Colombia a desaroyá su mes komo un di e merkadonan turístiko mas importante pa Kòrsou, te na e punto ku awe e ta e di tres pais unda mas turista ta prosedé di dje. E desaroyo aki ta ilustrá kon konektividat internashonal por bai kompañá ku oportunidatnan ekonómiko. Naturalmente, kada pais tin su propio karakterístikanan i kada desishon mester ta basá riba un evaluashon di su propio sirkunstansianan.

Na mes momentu, ta importante rekonosé ku kualke evaluashon di polítika di visa mester tene kuenta ku diferente interesnan di pais. Desaroyo ekonómiko, seguridat, kòntròl di frontera i e kapasidat di nos institushonnan pa garantisá un moveshon ordená di bishitantenan, ta aspektonan ku mester kana huntu. Eksplorá oportunidatnan nobo no ta nifiká pone e responsabilidatnan aki un banda. Al kontrario, un polítika ekonómiko sostenibel ta rekerí protekshon di interesnan di Kòrsou i ku esaki ta keda evaluá den un manera integral i responsabel.

E proseso pa evaluá e posibilidat di eliminá e obligashon di visa a haña atenshon tambe den e relashonnan den Reino. Durante bishita di Promé Minister di Hulanda di e tempu ei, Dick Schoof, na Kòrsou na 2025, Konseho di Minister a trata e tema aki. Konforme ku e responsabilidatnan vigente den Reino, ta e Minister di Asuntunan Eksterior di Hulanda tin e outoridat pa tuma desishonnan tokante introdukshon òf eliminashon di obligashonnan di visa pa entrada den paisnan di Reino.

Den 2026, Minister Middelhof a sigui e konsultashonnan ku e paisnan ruman den Reino, kaminda Aruba i Sint Maarten a ekspresá nan sosten pa sigui eksplorá e proseso. Na yüni di e mesun aña, durante un bishita na Santo Domingo, Minister Middelhof a reuní ku Minister di Asuntunan Eksterior di Repúblika Dominikana, Roberto Álvarez, kaminda ámbos a firma un akuerdo dirigí na fortalesimentu di e relashon entre Kòrsou i Repúblika Dominikana.

E business case entregá na Minister Tom Berendsen ta un paso mas den e trayekto aki. E dokumento ta pone e argumento ekonómiko den un kuadro mas amplio i ta brinda un base pa sigui e deliberashonnan ku e partnernan den Reino. E trabou preparatorio a konta ku kontribushon di Minister Middelhof i su ekipo na Ministerio di Desaroyo Ekonómiko (MEO), ku a traha riba e diferente kondishonnan i aspektonan ku mester wòrdu konsiderá den e proseso. Durante e entrega na Den Haag, Minister Middelhof a keda kompañá pa Minister Plenipotensiario, sr. Sidney Justiana, kende lo sigui e tema aki den Rijksministerraad na nòmber di Kòrsou.

E diskushon tokante visa mester wòrdu mirá tambe den e realidat ekonómiko aktual di Kòrsou. Pa garantisá kresementu na término largu, nos pais mester sigui diversifiká su fuentenan di entrada, stimulá emprendimentu, atraé invershonnan produktivo i krea mas oportunidatnan pa nos empresarionan i nos komunidat. Esei ta eksigí un bista ku ta bai mas leu ku nos fronteranan tradishonal i un disposishon pa identifiká partnernan ekonómiko ku por kontribuí na e aspirashonnan aki.

Den e konteksto aki, e relashon ku Repúblika Dominikana ta meresé un evaluashon serio. No solamente pa motibu di e tamaño di su ekonomia, sino tambe pa e posibilidatnan ku por eksistí den komèrsio, importashon, eksportashon, invershon, konektividat i kolaborashon empresarial. E pregunta fundamental ta kon Kòrsou por probechá di e dinamismo ekonómiko di nos region di un manera ku ta generá benefisio konkreto pa nos propio pais.

Minister Middelhof ta spera ku e business case lo kontribuí na un diskushon konstruktivo i na un evaluashon oportuno durante e próksimo Kingdom Summit, konforme ku e konsultashonnan anunsiá pa Promé Minister di Hulanda Rob Jetten huntu Promé Minister Pisas i  Promé Ministernan di Aruba i Sint Maarten. E intenshon ta pa sigui evaluá e posibilidat di un kambio den e polítika di visa, teniendo kuenta ku tantu e oportunidatnan ekonómiko komo e kondishonnan i responsabilidatnan ku e desishon aki ta trese kuné.

Segun Minister Middelhof, e futuro ekonómiko di Kòrsou ta dependé tambe di nos kapasidat pa rekonosé oportunidatnan na tempu, prepará nos mes debidamente i tuma desishonnan ku un bista riba e interes di pais na término largu. Den un region ku ta sigui transformá, Kòrsou no por keda solamente observá e desaroyonan rondó di dje. Nos mester sigui investigá unda tin posibilidatnan real pa nos empresarionan, nos sektor privá i nos ekonomia en general.

Nos reto komo pais ta pa sigui krea oportunidatnan nobo pa Kòrsou. E region ta desaroyá, merkadonan ta krese i e kompetensia pa atraé invershon ta bira kada bes mas grandi. P’esei, ta importante pa nos evaluá tur posibilidat ku por fortalesé nos ekonomia, semper ku e responsabilidat i kuido ku interesnan di nos pais ta eksigí.