E FIN DI SIMAN AKI NA SENTRO DEPORTIVO KÒRSOU… MAS DI 100 KARATEKA DI 10 DIFERENTE PAIS TA KOMPETIENDO DEN ‘CURACAO INTERNATIONAL OPEN 2016’

E FIN DI SIMAN AKI NA SENTRO DEPORTIVO KÒRSOU… MAS DI 100 KARATEKA DI 10 DIFERENTE PAIS TA KOMPETIENDO DEN ‘CURACAO INTERNATIONAL OPEN 2016’

Preparashonnan ta kompletá pa e gran kompetensha deportivo ku ta keda tene e fin di siman aki den Sentro Deportivo Kòrsou; ta trata aki di e torneo Internashonal di Karate, ‘Curaçao Open’ ku anualmente ta keda organisá i ku tur aña atrobe ta sigui krese i bira aun mas grandi.
Ya kaba CukarBo (Curaçao Karate Bond) tin konfirmashon ku mas di 100 karateka prosedente for di 10 diferente pais ta kompetiendo den e Curaçao Open. Djaweps tin e kurso di refree pa tantu esnan internashonal i esnan lokal.
Djabièrnè 7 di Oktober e kampeonato kategoría Hubenil ta kuminsa for di 6’or di atardi. Djasabra 8 di Oktober e torneo grandi aki ku demonstrashon di Kata i peleanan den kategoría Senior ta inisia for di tempran ku eliminashon for di 2’or di mèrdia. E final ta for di 7’otr di anochi.. E torneo grandi aki di karate, ‘Curaçao Open’ ta tuma lugá den Sentro Deportivo Kòrsou i entrada ta solamente 2 florin ku 50 sen pa mucha te ku 12 aña i 5 florin pa tur hende riba 12 aña.
Paisnan ku ta partisipá ta entre otro Puerto Rico, Argentina, Santo Domingo, Surnam, Trinidad, Martinique, Aruba, Boneiru, Kòrsou i Panama.
Fanatikonan di karate ta hañá oportunidat di mira karatekanan kampeon Internashonal den akshon. Nos por menshoná entre otro Ana Villanueva varios bes kampeon Panamerikano, rekonosí den Top Mundial i tambe ganador di World Games, Karina Diaz kende tabata tantu kampeon Sentro i Pan Amerikano i Dionisio Gustavo hopi bes kampeon Panamerikano. Tantu esakinan for di St. Domingo i medayistanan for di Argentina i e otro paisnan ta bai t’ei presente! Sóru pa bo t’ei presente na e ‘Curaçao Open Internashonal” aki.