MESTER TUMA BEK LOKE TA DI NOS. MOVEMENTU KIRATAY (MK) a tuma bon nota loke Mgr. Secco a presentá komo mensahe pa pueblo ku “NOS MESTER DISIDI KI SORTO DI KOMUNIDAT NOS KE LOGRA KU ELEKSHON”.

REDAKSHON October 4, 2016 0 Comments

MOVEMENTU KIRATAY (MK) ta kere ku e mensahe aki ta hopi lat, pero mas vale tarde que nunca.
MOVEMENTU KIRATAY (MK) ta señalá ku si nunka bo a siña òf eduká bo yu òf pueblo kon kana riba e bon kaminda, kon bo por ferwagt ku e lo kana riba e bon kaminda.
Instruí un mucha den e kaminda ku e mester kana i asta ora ku e bira bieu e lo no apartá su mes for di dje.
Kon nos pueblo por vota pa e.o. onestidat, integridat, konfiabilidat, si nunka a pone atenshon òf duna atfertensha òf duna guia i direkshon riba esakinan.
Pa años a bin ta sembra odio, rabia, hakmentu di pia, manipulashon, mentalidat di AMI,AMI, divishon, usando gobernashon pa bira riku riba lomba di pueblo, kreando un pueblo ignorante ku promesanan falsu, etc. etc..
Nos pueblo a mira i tende loke lidernan den nos komunidat a hasi i a sigui e ehèmpelnan ei.
Awe lidernan i esnan ku ta sigui ta hasiendo nos pueblo mendigo i sin dignidat pa nan haña poder pa enrikesé nan mes i esnan rondo di nan, lubidando di ta sirbidó di e mesun pueblo ku a duna nan e poder.
Loke bo sembra bo ta kosechá.
Nunka a eduká, ni edifiká, ni forma nos pueblo pa sa:
= ken nos ta
= dikon nos t’aki
= di unda nos a bini
= kiko nos a bin hasi
= unda nos ta bai.
Awe nos konosé 13 partido.
Riba kada partido tin personanan kreyente ku mester konose E Palabra di Dios ta aseptá lidernan ku no ta aliñá ku Dios.
MOVEMENTU KIRATAY (MK) no ke husga, pero sabi ku na e bon fruta bo ta konosé e bon palu.
E bon fruta ta bin for di e palu ku a risibí tur bon atenshon.
Awor si tur e kreyentenan ku ta sigui berdaderamente e bon palabra, UNI, MOVEMENTU KIRATAY (MK) ta sigur ku nos pueblo lo risibí e bon siñansa i nos futuru lo ta sigurá.
Pues no mester grita ora baka hoga na pos, pero sea diferente i aktua pa prevení i evitá ku nos ta bai pèrdí.
Awor si tur esnan ku ta kere berdaderamente den e Dios ku a krea tur kos, uni forsa i apliká Su palabra, Curaçao lo haña e gobernantenan i gobernashon ku e mester i meresé.
Nos no mag i no por keda sinta meimei di 4 muraya òf para kantu sin sali pa tuma bèk loke Dios a predestiná pa nos.
Nos mester guia i dirihí segun E Palabra pa sana nos pais pa e ta unu di amor, pas i hustisia.
MOVEMENTU KIRATAY (MK) a dal e stap pa yega na unidat di nos pueblo pa medio di e vehíkulo di gobernashon.
MOVEMENTU KIRATAY (MK) a saka man pa sosten i yudansa pa yega na un pueblo, pais, nashon ku ta teme i onra Dios, pa krea hustisia igual, pas i amor pa otro.
MOVEMENTU KIRATAY (MK) a retirá for di e kontienda elektoral pa no wòrdu konsiderá òf tildá bou di e mesun kapa ku e otronan, sin por a duna e informashonnan nesesario.
Awe nos por ta lat pa e kambio pa bon awor(sèpt. 2016) pero Hesus a bisa ku E no ta yega lat nunka.
Ta p’esei MOVEMENTU KIRATAY (MK) ta sigui hasi tur posibel pa logra su meta pero ku pasenshi ta warda riba señal di Esun Todopoderoso kon sigui.
Hesus ta warda pero no tarda pasobra Su binida ta serka.
MOVEMENTU KIRATAY (MK) ta aprobá, apoyá, sostené e pensamentu ku mgr. Secco a vosiferá pero nos mester kuminsá aktua, dunando guia i direkshon na un pueblo ku ta perdiendo tur norma i balor pa medio di ehèmpelnan “robes”.
MOVEMENTU KIRATAY (MK) ya ta pará kla pa sigui kore e kareda te final.
29 sèptèmber 2016