Gobièrnu huntu ku Minister Rhuggenaath di PAR ta firma kombenio ku Universidat di Amsterdam pa kaba ku nos universidatnan lokal

Gobièrnu huntu ku Minister Rhuggenaath di PAR ta firma kombenio ku Universidat di Amsterdam pa kaba ku nos universidatnan lokal

Minister Rhuggenaath di PAR despues ku a kaba insultá trahadónan a disidí awó na lugá di traha pa drecha ekonomia a bai hunga den ministerio di enseñansa dor di firma un kombenio ku Universidat di Amsterdam pa no solamente nan bin establesé nan mes aki sino tambe ku e Universidat enkuestion por ofresé tambe pa duna enseñansa riba nivel universitario.
E kos remarkabel den esaki ta, kon por ta posibel ku Minister di Ekonomia ta sera tipo di kombenionan asin’aki miéntras e minister di enseñansa no tabata enbolbí den henter e kaso aki.

Frakshon di MFK tin gana di sa di e Gobièrnu aki ku e lokual ku e universidat di Amsterdam ta bin hasi Kòrsou e universidatnan di Kòrsou no por hasi esakinan. Bo ta mira kla ku e Gobièrnu aki ta bin trese un kompetensha direktamente kontra nos universidatnan lokal. Pa kolmo e kompetensha aki ta inhustu pasombra e universidat di Amsterdam ta haña supsidio di fondonan di Europa i tambe di e Gobièrnu di Hulanda miéntras aki tin universidatnan ku no ta haña nada di supsidio i esun mes ku ta haña ta risibí un supsidio minimal ku no ta yega pa drai e universidat riba un base normal sin défisit.

E gobièrnu aki ku ta yegando su último dianan di eksistensha den pitu anto pa kolmo dia 30 di sèptèmber 2016 ta firma un kombenio pa kaba ku eksistensha di tur universidatnan aki na Kòrsou. Gobièrnu ta bon na altura ku e supsidio ku e ta duna na universidat di Kòrsou ku ta e aña aki 17.5 mion florin no ta yega i pa kolmo pa otro aña e gobièrnu aki ku a traha e presupuesto ta bolbe kòrta 2 mion den esaki pa hinka e universidat di Kòrsou aún mas den problema grandi pasombra nan ta na altura ku ta 21 mion florin mester pa aña pa e operashonnan di e universidat.

Di e manera aki Gobièrnu konsientemente ta habri portanan pa gigantenan di Hulanda bini bin kaba ku nos universidatnan enbes di hasi esaki a base di koperashon mutuo.
E manera aki Gobièrnu mes ta hinka e universidat di Kòrsou den un posishon difísil pasombra loke e gigantenan di Hulanda ta ofresé na alumnonan e universidatnan di Kòrsou no por pasombra e fondonan ku nan tin na nan disposishon ta hopi limitá pa por ofresé esakinan na alumnonan.

Finalmente e pregunta ta surgi dikon e kos aki a bai kuchi, kuchi entre Minister Rhuggenaath i Universidat di Amsterdam sin ku a enbolbí ningun stakeholder di enseñansa ni tampoko minister di enseñansa. Kon por ta ku riba e wepsait di Transnational Education (TNE) ku minister Rhuggenaat for di aña pasa ke implementá nos universidatnan di Kòrsou no ta aparesé riba lista di universidatnan lokal.

No tin duda klaramente bo por mira ku e Gobièrnu aki ku tin enseñansa tur dia den nan vokabulario, den pitu tin plannan avansá pa kibra i kaba ku nos universidat lokal.

Amerigó Thodé
thode_amerigo

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: