Ruta Historiko di Rif Old City

Rif Old City 5 di òktober 2016.

Ban keiru, konosé i rekonosé balornan sosial kultural i históriko den nos barionan. Esaki ta e lema di Unidat di Brio en koperashon ku algun bario di Kòrsou. Fundashon Rif den nos afan pa sigui duna realse na nos bario ku ta riba lista di Unesco, i ku tin edifisionan asina pintoresko ku arkitektura espektakular lo ta esenario pa e evento “ Ruta Históriko den Rif Old City “. Esaki lo tuma lugá dia 9 di òktober 2016.

E evento aki lo duna realse na personanan i edifisionan históriko ku a nifiká hopi pa Kòrsou. E parti mas importante di e evento aki ta ku nos Hóbennan di bario lo ta e anfitrionnan pa relatá bida i historia di e personahenan i edifisionan. Nos hóbennan lo ta den spotlight positivo i e spin off effect ta ku den futuro nan por bira entrepreneur hasiendo walking tour.

Lo tin un rekorido den e 22 steegjesnan den Rif Old City kaminda lo relatá historia di edifisionan i personahenan ku a hasi hopi pa Kòrsou. Un tremendo inisiativa di Unidat di Bario pa duna realse na barionan den un tempu kaminda desaroyadó nan ta kambia strukturanan di bario ku hopi bia e bario ta bira irekonosibel. Nos di Fundashon Rif a bin ta desplegá un trabou rigoroso pa nos bario por mantené e outentisidat di kual e ta wòrdu karakterisá.

Nos tin ku apuntá ku ainda den nos bario tin e fenómeno di bentana di bende kos, ainda nos bario tin e kontròl sosial ku tabata karakteris’é semper. Ainda den nos bario ora un habitante fayesé práktikamente tur hende ta hasi akto di presensia. Kosnan ku nos No ke laga bai, te pa nos tin ku bai reskatá nan. Nos tin ku bisa ku tin kosnan ku a bai atras, ku tambe nos ta trahando arduamente riba nan pa nos por bira “ the place to be”.

For di un bario ku a nanse na 1707 ora Punda a bira sobre pobla kaminda un kantidat inkontabel di personanan ku a hasi un kantidat di kos pa e pais aki ku yama Kòrsou a nanse i biba, nos ke bai pa ekselensha. Nos invitashon ta bai na abo bin konosé un parti di nos bario di Rif.

Dia 9 di òktober 2016
Ora 4 or di atardi nos ta start na Riffort
Karchi: na balor di 5 florin
Por yama pa karchi na w- app 672-8056 tel: 515-9681