Proyekto Tereno pa Tur, pero na òrdu sí: Seshon di informashon na Bonam tokante okupashon ilegal di tereno

Proyekto Tereno pa Tur, pero na òrdu sí: Seshon di informashon na Bonam tokante okupashon ilegal di tereno

Willemstad – For di fin di ougùstùs ora Domeinbeheer a kuminsá ku un serie di seshon di informashon den bario den kuadro di e proyekto ‘Tereno pa Tur’, ya a tene 3 seshon. Awor ta turno pa e di 4, kual lo tuma lugá djárason awor 12 di òktober 2016, di 7or pa 9or di anochi na Sentro di Bario Bonam. Porta lo habri for di 6.30 or. E seshonnan ta trata spesífikamente e tema di okupashon ilegal di tereno di gobièrnu.

Habitantenan den e área di Bonam ku ta bin na remarke pa e seshon aki ta esnan ku ta biba na Ronde Klip, Cocorie, Schelpwijk, Brievengat, Muizenberg, Tra’i Seru, Kirindongo Abou, Noord Zapateer, Cas Cora, Abrahams, Popo i Oost Jongbloed.

Durante e seshon Domeinbeheer ta duna presentashon ku informashon detayá tokante entre otro e proyekto ‘Tereno pa Tur, pero na Òrdu Sí’, e Maneho di Gobièrnu riba okupashon ilegal di Tereno, e prosedura di formalisashon, akshonnan di mantenshon di òrdu (den kaso ku por ehèmpel no hasi petishon pa formalisashon), konsekuensianan ora no por formalisá i perspektivanan ku tin den tapara. Despues di e presentashon tin oportunidat pa hasi pregunta i risibí kontesta.

Tambe lo tin oportunidat pa personanan den e barionan menshoná registrá pa formalisashon. Si un persona ke formalisá e mester bin ku su ID i e persona mester por mustra riba mapa unda mas o ménos su kas/ konstrukshon ta keda.

Domeinbeheer pronto lo organisá seshon di informashon asin’aki den áreanan di Tera Kòrá, Barber i Piscadera. Lo anunsiá e fecha i lokalidat pa kada área despues. Minister di Tráfiko, Transporte i Planifikashon Urbano, Señora Suzanne Camelia-Römer huntu ku Domeinbeheer ta spera ku tur habitante lo partisipá na e seshonnan aki.

Ministerio di Tráfiko, Transporte i Planifikashon Urbano

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: