12.059,48 PA KRUS KÒRÁ KÒRSOU

12.059,48 PA KRUS KÒRÁ KÒRSOU

Selikor NV i Fundashon Kòrsou Limpi Bunita (FKLB) a organisá djadumingu, 11 di sèptèmber 2016, e promé edishon di Stènki Busters Hunt (SBH) ku a bai dediká na e organisashon Krus Kòrá Kòrsou. Un kantidat di 87 grupo den nan outo a partisipá na e scavenger hunt akí i tabata riba ruta for di mainta trempan pa kumpli ku e diferente tareanan di e hunt. E tòp 3 timnan ku a bai ku premio ta representantenan di Guardian Group Fatum komo ganadó apsoluto, Maduro & Curiel’s Bank na di dos lugá i Ictual na di tres lugá. E hunt a produsí un total di 12.059,48 florin ku a bai pa Fundashon Krus Kòrá Kòrsou.

E proyekto komunitario akí a wòrdu organisá komo parti di e plan di maneho di Selikor den kua tin stipulá ku e kompania ta karga su responsabilidat sosial i ta duna bèk na komunidat. Pa e edishon di SBH 2016 a skohe pa pone Krus Kòrá den lus. Krus Kòrá ta un organisashon ku ta desplegá aktividatnan na bienestar general i nan nesesidat aktual ta pa yega na un ambulans nobo. Tur fondo ku a rekoudá ku benta di karchi, sènnan ku a kolektá durante di e aktividat i tambe parti di e premionan kèsh na e ganadónan a bai komo donashon na Krus Kòrá Kòrsou.

Komo meta di e aktividat akí Selikor i FKLB tabatin tambe pa e partisipantenan en partikular i komunidat en general mas konsiente riba importansia di un isla limpi dor di elevá nos sentido di patriotismo i amor pa nos pais. Pa e motibu akí durante di e aktividat a dirigí e atenshon riba entre otro e kantidat di shushi bentá na sitionan ilegal. Tambe e partisipantenan di SBH a traha, huntu ku e artista Garrick Marchena, un ‘pintura di muraya’ na Kurá di Shon Ki. Komo tarea di e hunt e partisipantenan mester a vèrf e number(nan) ku nan a risibí di e artista i huntu a forma e pintura. Ku e akshon akí Selikor i FKLB a sòru pa “beautify” un área ku ta konosí pa depositá shushi ilegal. Meta di e tarea akí durante di e SBH tabata pa krea un sentido di “community” den e partisipantenan i tambe hasi e área unu kaminda hende ta haña mas agradabel pa trafiká. Mas trafikashon di hende lo por yuda den evitá ku hende lo dúmp shushi ya ku ta sientífikamente probá ku mas bunita un área ta, ménos chèns tin ku un hende lo shusha.

E proyekto akí a resultá unu sumamente éksitoso. Tabatin un kantidat basta grandi di entre otro kompania, fundashon, gruponan di amigu i famia ku a partisipá i asina duna nan aporte na Krus Kòrá. E mainta a bai den un ambiente ameno kaminda e timnan a kompetí sanamente kontra di otro, eksplorá nos isla, dibertí i tabata sosialmente aktivo.

Selikor i FKLB ta sumamente agradesido na tur e timnan ku a partisipá i ku a hasi e evento akí unu grandi. Nos por mira bèk riba un dia sumamente eksitoso kaminda ku nos a logra enkurashá nos komunidat pa apresiá i balorá nos naturalesa aun mas i alabes kontribuí na un kousa noble. Nos ta konvensí ku nos a habri wowo di hopi persona i ku awe nan por kontribuí di forma mas konsiente na un Kòrsou limpi i bunita.

Awor ku e scavenger hunta ta tras di lomba Selikor i FKLB ta lansa e Stènki Busters Movement (SBM). SBM mester bira un moveshon na kua komunidat kompleto lo partisipá ku e meta pa keda mustra riba e responsabilidat ku komo suidadano kada un di nos mester karga pa tene i mantené nos isla limpi. Lo bai tin mas aktividat i proyektonan dirigí riba nos komunidat den su totalidat i tambe den nos barionan, esaki den estrecho kolaborashon ku entre otro Unidat di Bario. Laga nos tur ban sigui e moveshon akí i ban Bust the Stènki.

dsc_1555

dsc_1560

dsc_1565

dsc_1571

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: