Aruba ta bay cu e premionan mayor di The Aruba Chess Challenge 2016 den Seccion U-18

Aruba ta bay cu e premionan mayor di The Aruba Chess Challenge 2016 den Seccion U-18

Riba dianan 6 te cu 9 di Oktober pasa, Federashon di Ajedrez Aruba a organisa su unico torneo internacional organisa na Aruba y reconoci pa e Federashon Internacional di Ajedrez (FIDE), esta The Aruba Chess Challenge. Tabatin tres seccion: Abierto, U-18 y U-12 y tabatin participante di 5 pais: Aruba, Alemania, Corsou, Suriname y Venezuela.

Den e Seccion U-18 un total di 19 hungador di Aruba (15), Suriname (3) y Venezuela (1) a participa. Tur e 4 dianan tabatin hopi tension, ya cu tabatin un lucha grandi pa wak ken ta bay gana e torneo y alabes weganan di calidad halto tabata ser hunga cualnan a entretene tur hende presente. Durante 4 dia a hunga 7 buelta. Door di e cantidad desigual di hungador, tur buelta un hungador tabata haya un “bye”.

E prome buelta a ser hunga diahuebs anochi dia 6 di Oktober. Despues di e buelta aki, un total di 10 hungador tabatin un punto. Riba e di dos dia, esta diabierna dia 7 di Oktober, bueltanan 2 y 3 a ser hunga. Akinan e hungador di Venezuela Ulises Jose Hernandez Mora, cu alabes tabatin e rating mas halto di tur participante, tabata lidera e torneo cu 3 punto, sigui pa Pratul Panchoe (SUR) y Brian Diaz (ARU) cu 2,5 punto, mientras 7 hungador tabatin 2 punto nan tras.
Diasabra dia 8 e bueltanan 4 y 5 a ser hunga. Na final di dia, diferente cambio a tuma lugar den e top ranking. E hungador di Suriname Pratul Panchoe tabata su so na prome lugar na final di dia cu 4,5 punto. Empata na di dos lugar tabata sigui Brian Diaz (ARU) y Ulises Hernandez (VEN) ambos cu 4 punto. Na di cuater lugar tabata sigui Shailesh Kandhoesing (SUR) cu 4 punto y su tras tabatin 5 hungador cu 3 punto.
Diadomingo tabata e dia cu mester a dicidi tur cos locual ta trata e lucha grandi pa e prome tres puestonan. E bueltanan 6 y 7 a ser hunga y despues di dos buelta yena di bataya, hopi emocion y hasta lagrima, e hungador di Aruba Brian Diaz a logra gana e torneo terminando cu 6 punto. Na di dos lugar un total di 4 hungador a termina cu 5 punto y despues di reglanan di desempate na di dos lugar a termina Pratul Panchoe di Suriname, mientras cu na di tres lugar a termina Ulises Jose Hernandez Mora di Venezuela. E otro dos hungadornan cu a termina cu 5 punto ta Sebastian Torres di Aruba (cu no por tabata presente pa 2 buelta, pero si a gana tur 5 wega cu el a hunga!) y Eldrick Donata, tambe di Aruba.

Tabatin dos premio importante mas pa ser duna, cu tabata e prome lugar den e categoria di edad inoficial U-16 y e prome lugar den e categoria inoficial di U-14. Aruba a logra di bay cu ambos premio. Den U-16, Eldrick Donata (5 punto) a gana e premio aki, mientras cu den U-14 e prome lugar a bay pa Kellen van Deutekom cu tabatin 4 punto.

Un biaha mas Federashon di Ajedrez Aruba kier a felicita tur e hungadornan cu a gana premio y tur participante pa un torneo hopi exitoso. Alabes FAA kier a agradeci sponsoring di Comision di Subsidio y Clickprint, mientras cu MFA Paradera a huur e lugar pa un prijs hopi special: masha masha danki!