Si señora gobernador ainda no ta logra identifiká e problemanan mas agudo di e komunidat aki, anto otro lidernan sí mester hasié!

Si señora gobernador ainda no ta logra identifiká e problemanan mas agudo di e komunidat aki, anto otro lidernan sí mester hasié!

Willemstad, Despues ku e komunidat di Kòrsou a konfrontá ku un enorme deterioro den e sirkunstansia en general, loke a manifestá klaramente den e áreanan mas esensial di bida ku ta nos barionan, pero tambe riba plenchinan di skol, a bira nesesario pa gobernantenan atraves di gobernashon porfin sa di pone e aksèntnan kaminda mester ta. E sirkunstansia sosial aktualmente ta unu bastante horibel, inkluyendo prinsipalmente deskuido total di hubentut i penshonadonan! Gobernashon mas ku nunka mester ta klaramente dirigí pa krea kondishonnan ku ta garantisá bienestar i adelanto di hinter e pueblo. Partidonan polítiko manera Frente Obrero, Pueblo Soberano i awendia Kòrsou di Nos Tur pa gran parti a hustifiká nan rason di eksistensia netamente riba e base aki: “Mester bin kambio den e esfera sosial di nos pueblo, pasobra tur hende tin derechi riba un bida na drechi!” Komunidat di Kòrsou, no opstante tur desepshon ku el a soportá pa vários dékada, a sigui kere den e posibilidat di laga nos problemanan keda resolvé via gobernashon, esta via e kaminda demokrátiko ku elekshonnan liber i sekreto! Den un di e komunikadonan ku a sali di parti di Kabinèt di Gobernador despues di elekshon, ta hasi menshon ku nos isla ta pará dilanti di retonan grandi manera riba tereno di enseñansa, salubridat i e seguridat den nos pais. Ademas ta referí na promové koheshon sosial, kresementu ekonómiko stabil i atenshon kontinuo pa e situashon finansiero di gobièrnu. Hecho ta ku Kòrsou durante e último añanan a konosé kasonan di likidashon teribel kaminda a hasi uzo di armanan sofistiká. No unu sino vários likidashon sangriente a tuma lugá na sitionan públiko, poniendo un punto final na bida di sernan humano ku a forma parti di e komunidat kurasoleño. Na pir di Mari Pampun hasta e parlamentario Helmin Wiels a pèrdè su bida i ainda e kaso no ta resolvé!
Den e evaluashon di tur e kasonan aki por remarká ku algun biaha outoridatnan a laga parse ku ta resultado di konfliktonan entre miembronan metí den narkotrafikashon, entre miembronan di bandanan kriminal i of gruponan aktivo den sierto barionan. No papia mes di atrakonan armá riba komersiantenan i ladronisia di outo ku ta finalisá den plumamentu pa kumpra i bende piesa.
Por lo general gobernashon di Kòrsou nunka no tabata fuerte den atendé problemanan na base den nos komunidat, envolviendo e habitantenan mes i duna partisipashon. Komo tal a laga núkleonan asina importante manera famia i bario debilitá te na e ekstremo ku esakinan a pèrdè funshonnan klave ku nan tabatin ántes den formashon, edukashon, kombibensia, sentido di kòntròl sosial etcetera. Kasi ta normal awendia ku barionan ta shushi, a-higiéniko i ku poko boluntat i sentido di koperashon entre habitante i bisiñanan. Remarkabel ta e kantidat di suidadanonan ku ta bisa ku e votonan masal depositá pa Hensley Koeiman ta nada otro sino un gritu pa un kara muchu mas sosial den gobièrnu. Gobernador señora Lucille George-Wout ku su enkargo na informador Kenneth Gijsbertha ningun momento so no ta menshoná e puntonan aki ku pa Kòrsou aktualmente ta tòg e refleho mas kompletu di e sirkunstansia penibel ku nos ta aden, esta e tendensianan sumamente materialista i individualista ku nos komunidat ta konfrontando kuné, kousando pobresa, krímen i inseguridat. Gobernashon enbèrdat ta pará dilanti di un krusada importante. Sea ta kontinuá di e forma kaminda den práktika ta nifiká sigui ekskluí gruponan grandi di e komunidat aki ku tur e konsekuensianan ku esaki ta trese kuné of ta ban pa e tipo di gobernashon kaminda deliberadamente ta traha na mehoransa di e sirkunstansia di bida na base, esta den nos bario i of zonanan. Ta keda na lidernan pa identifiká e trayekto aki komo esun mas esensial den esfuersonan pa drecha loke ta sklama pe na Kòrsou.
Erwin Raphaela