Orashon djasabra 22 di òktober 2016

Den e tempu ei algun hende a yega i a konta Hesus tokante e galileonan, ku Pilato a laga mata ora nan tabata ofresé sakrifisio; nan sanger a meskla ku esun di e bestianan. El a kontestá nan: ‘Boso ta pensa ku e galileonan ei tabata mas pekadó ku tur otro galileo, pasobra esei a pasa ku nan? Apsolutamente ku nò! Ma si boso no kombertí, boso tur lo kaba na nada meskos ku nan. Òf boso ta pensa ku e diesocho hendenan ku a muri ora ku toren di Siloam a basha aden, tabata mas kulpabel ku tur otro habitante di Herusalèm? Apsolutamente ku nò! Ma si boso no kombertí, boso tur lo kaba na nada meskos ku nan.’ El a konta nan e parábola akí: ‘Un hende tabatin un palu di figo den su hòfi di wendrùif. El a bin mira si tabatin fruta na dje, ma e no a haña nada. E ora ei el a bisa su fitó: “Ya ta di tres aña ku mi ta bin wak si e palu akí tin fruta i mi n’ ta haña nada. Kap e basha abou numa. Pakiko lag’é sigui probechá di bon tera?” E fitó a bis’é: “Señor, lag’é palu e aña akí; lo mi plug e tera rònt di dje i pone mèst. Si e karga fruta otro aña, ta bon; si no, kap e numa.” ’
Lukas 13:1‭-‬9